சிங்கள மொழி பிரச்சாரத்தில் அந்நியப்பட்டுவிட்டோமா?

இலங்கை முஸ்லிம்கள் எதிர்கொள்ளும் மிகப் பெரிய பிரச்சினை இனவாதம் என்றால் அது மிகையாகாது. 

இனவாதத்தை விட்டும் முஸ்லிம்களை காப்பாற்றுவதற்காக பல தரப்பாரும் பலவிதங்களில் தங்கள் முயற்சிகளை செய்திக் கொண்டிருக்கின்றார்கள். இந்த முயற்சிகள் அனைத்தும் பெரும்பாலும் பிரச்சினைக்குறிய தற்கால தீர்வாகத்தான் ஆகுமே தவிர அவை நிரந்தரத் தீர்வுகளாக மாறாது.

அப்படியானால் இனவாதத்திற்கான நிரந்தரத் தீர்வு என்ன? என்ற கேள்வி எழுவது சகஜம்.

இன்று இலங்கை முஸ்லிம்கள் பல விதமான கேள்விகளை மாற்று மத சகோதரர்களிடமிருந்து சந்திக்கின்றார்கள்.

குறிப்பாக இஸ்லாம் பற்றிய விமர்சனங்கள், குற்றச்சாட்டுக்கள் எல்லாம் தாராளமாக முன்வைக்கப்படுகின்றன. இந்த குற்றச் சாட்டுக்களுக்கு பதில் சொல்ல வேண்டிய பொறுப்பு நம் அனைவருக்கும் இருக்கின்றது.

• முஸ்லிம்கள் தாடி வைப்பது ஏன்?
• சிங்கள மக்களுக்கு உணவளிக்கும் போது மூன்று முறை எச்சில் துப்பிவிட்டுத் தான் கொடுக்க வேண்டும் என்று குர்ஆன் சொல்கின்றதா?
• பெண்கள் உடலை மறைத்து ஆடை அணிவது ஏன்?
• முஸ்லிம் ஆண்கள் கத்னா செய்வது உடலை வருத்திக் கொள்வதாக ஆகாதா?
• குர்ஆன் எல்லாக் காலத்திற்கும் பொருத்தமான ஒரு வேதம் தானா?
• முஸ்லிம்களுக்கு மத்தியில் இத்தனை பிரிவுகள் ஏன்?

இப்படி எத்தனையோ விதமான கேள்விகள் முஸ்லிம் சமுதாயத்தை நோக்கி மாற்றுமத குறிப்பாக மாற்று மொழி பேசும் பௌத்த சகோதரர்களினால் முன்வைக்கப்படுகின்றது. இந்த கேள்விகளுக்கு பதிலளிப்பது யார்? இந்த மக்களின் மனநிலையை சரி செய்வது யார்?

மாற்று மொழி தஃவா இன்மை ஏற்படுத்திய விளைவுகள்.

மாற்று மொழியில் இஸ்லாமியப் பிரச்சாரத்தை சரியான முறையில் நாம் மேற்கொள்ளாத காரணத்தினால் இன்றைக்கு பல சிக்கள்களை எதிர்கொள்கின்றோம். குறிப்பாக இனவாதம் பேசுபவர்கள் இஸ்லாமியர்கள் மீது வைக்கும் போலி குற்றச்சாட்டுக்கள் கூட உண்மையாக இருக்குமோ என்று நம்பும் அளவுக்கு மாற்று மொழி பிரச்சாரத்தில் நாம் பின்தங்கி விட்டோம்.

இஸ்லாத்தை பின்பற்றாத முஸ்லிம்களை பாரம்பரிய முஸ்லிம்கள்; அவர்கள் செய்வதுதான் இஸ்லாம் என்றும், உண்மையில் இஸ்லாத்தை அதன் தூய வடிவில் பின்பற்றுபவர்கள் தீவிரவாதிகள்; இவர்கள் இஸ்லாத்தின் பேரால் மற்ற மக்களுக்கு எதிராக செயல்படுபவர்கள் என்ற ஓர் எண்ணமும் ஊட்டப்படுவதற்கு இது காரணமாக அமைந்திருக்கின்றது.

இந்நிலையை மாற்ற என்ன வழி?

உண்மையில் இன்றைய இலங்கை முஸ்லிம்கள் மீது கட்டாய தேவையாக இருப்பது மாற்று மத மக்கள் மத்தியிலும் தூய இஸ்லாத்தை பிரச்சாரம் செய்வதாகும். இதற்கு தேவையான வளங்களை நாம் உண்டாக்கிக் கொள்வதினூடாக இந்தப் பிரச்சாரத்தை செவ்வனே சரியான முறையில் முன்னெடுக்க முடியும்.

நமது செய்ய வேண்டியது என்ன?

சிங்கள மொழியில் பிரச்சாரம் செய்வதற்கு தகுதியான பேச்சாளர்களை உருவாக்குதல்.

சிங்கள மொழியில் எழுதுவதற்குத் தேவையான எழுத்தாளர்களை திட்டமிட்டு உருவாக்குதல்.

குர்ஆன் மற்றும் ஆதாரப் பூர்வமான ஹதீஸ்களின் மூலம் தெளிவான மார்க்கத்தை எத்திவைக்கும் சிந்தனா தரம் கொண்ட, இதய சுத்தியுடன் பாடுபடக் கூடியவர்களை அவர்களை கட்டமைத்தல்.

சிங்கள மொழியில் தூய இஸ்லாமிய கருத்துக்கள் அடங்கிய புத்தகங்கள் மற்றும் சி.டி க்களை வெளியிடுதல்.

சிங்கள சகோதரர்களின் மனங்களில் இடம் பிடிக்கும் இஸ்லாத்தின் தெளிவான கருத்துக்கள் அடங்கிய ஒரு பத்திரிக்கையை வெளியிடுதல். இது மாதாந்த, வாராந்த அல்லது நாளாந்த பத்திரிக்கையாக கூட இருக்கலாம்.

டி.வி மற்றும் வானொலிகளின் மூலம் சிங்கள மொழியிலான இஸ்லாமிய கருத்துக்களை மக்கள் மத்தியில் கொண்டு செல்லுதல்.

போன்ற காரியங்களை நாம் திட்டமிட்டு முன்னெடுக்கும் போது இறைவனின் அருளினால் இஸ்லாமிய மார்க்கப் பிரச்சாரம் இலங்கை மண்ணில் சீராக முன்னெடுக்கப்படும் என்பதில் எவ்வித ஐயமும் இல்லை.

ஸ்ரீ லங்கா தவ்ஹீத் ஜமாத்தின் சிங்கள மொழி பிரச்சாரங்கள்.

இறைவனின் அருளினால் ஸ்ரீ லங்கா தவ்ஹீத் ஜமாத் சிங்கள மொழியிலான தனது பிரச்சாரத்தை செவ்வனே நடை முறைப்படுத்தி வருகின்றது.

இது வரைக்கும் சுமார் 20 க்கும் மேற்பட்ட புத்தகங்கள் சிங்கள மொழியில் வெளியிடப்பட்டுள்ளன. தமிழ் மொழியில் சகோதரர் பி.ஜெ அவர்கள் எழுதிய புத்தகங்களின் மொழியாக்கங்களாக இவை காணப்படுகின்றன. தமிழ் மொழியில் பாரிய புரட்சியை உண்டாக்கிய இந்த புத்தகங்கள் சிங்கள மொழியிலும் பாரிய மாற்றங்களை உண்டாக்கி வருகின்றன.

அது போல் மாற்று மத அன்பர்களின் இஸ்லாம் பற்றிய சந்தேகங்களை தீர்க்கும் விதமாக, இஸ்லாத்தின் சத்தியக் கொள்கைகளை நேரடியாக தெளிவுபடுத்தும் மாற்று மத அன்பர்களுக்கான கேள்வி பதில் நிகழ்சியையும் நாடு முழுவதும் நாம் நடத்தி வருகின்றோம்.

“இஸ்லாம் ஓர் இனிய மார்க்கம்” என்ற பெயரில் தமிழ் மொழியில் சகோதரர் பி.ஜெ அவர்களினால் நடத்தப்பட்டு தமிழ் பேசும் மக்கள் மத்தியில் பலத்த மாற்றத்தை உண்டாக்கிய இந்த நிகழ்ச்சி அதே பெயரில் சிங்கள மொழியில் இலங்கையிலும் நடத்தப்படுகின்றது. இஸ்லாம் பற்றி மாற்று மத அன்பர்களுக்குள்ள சந்தேகங்களை நேரடியாக கேட்டுத் தெளிவுபெரும் ஒரு ஜனரஞ்சக நிகழ்ச்சியாக இதுவிருப்பது மக்கள் மத்தியில் பலத்த வரவேற்பைப் பெற்றுள்ளது.

சிங்கள மொழி மூலமான இஸ்லாமியப் பிரச்சாரகர்களை உருவாக்கும் நன்னோக்கில் சனிக்கிழமைகளில் சிங்கள மொழி மூலமான பயிற்சிகள் நடத்தப்படுகின்றது.

இணையதளத்திலும் சிங்கள மொழி மூலம் இஸ்லாமியப் பிரச்சாரத்தை முன்னெடுக்கும் விதமாக தனியான ஒரு இணையதளமும் தயாராகிக் கொண்டிருக்கின்றது என்பது மேலதிக தகவலாகும்.

சிங்கள மொழி மூலம் இஸ்லாத்தை எத்தி வைக்கும் ஸ்ரீ லங்கா தவ்ஹீத் ஜமாத்தின் பணிகள் என்றென்றும் வெற்றிபெற ஏக இறைவனை பிரார்த்திப்போமாக!

rasminmisc

Posted by Unknown 1:30 AM 0 comments

இந்தியாவை ஆட்டிப்படைக்கும் அமெரிக்க மோகம்!

சமீப காலமாக இந்திய சினிமாகள் அமெரிக்க மோகத்தை உரமிட்டு வளர்க்கின்றன என்றே சொல்லலாம்.

அமெரிக்க மோகத்தின் தாக்கம் தமிழ் சினிமாக்களை கூட விட்டு வைக்க வில்லை. ஒவ்வொரு தமிழ் சினிமாவிலும் ஏதாவது ஒரு அமெரிக்க புராணம் பாடும் வசனம் இருக்காமல் இல்லை.

அதற்கெல்லாம் மகுடம் சூட்டும் வகையில் நமது தமிழ் புலவர்கள் சிவாஜி படத்திற்கு பாடல் எழுதினர். காவேரி ஆறும் கைகுத்தல் அரிசியும் மறந்து போகுமா என்கிற பாடலில் அண்ணன் வந்தால் தமிழ் நாடும் மாறும்  அமெரிக்கா என்கிற வரியை சேர்த்தனர். 

அதுபோல், விஸ்வரூபம் பட பிரச்சனையில் கமல் நான் இந்தியாவை விட்டு வெளியேற போகிறேன் என்று சொன்னது அமெரிக்காவில் செட்டில் ஆகும் நோக்கில்தான். இதை கூட அவர் விஜய் டிவியின் நீங்களும் வெல்லலாம் நிகழ்ச்சியில் அந்நிய பெண்களுக்கு முத்தம் கொடுத்த காட்சிக்கு பின்னர், சில நண்பர்கள் என்னை ஹாலிவுட்டில் இருக்க வேண்டிய ஆள் என்று சொன்னதாக சொல்லி காட்டுவார்.

இப்பொழுது அதற்க்கெல்லாம் ஒருபடி மேல் சென்று அமெரிக்கா விசா கிடைத்தால்தான் ஒருவர் இந்திய பிரதமர் வேட்பாளருக்கே தகுதி பெற்றவர் என்கிற நிலை உருவாகி  விட்டது. அமெரிக்காவிற்கு விசா மறுக்கப்பட்ட ஒருவரை இந்திய பிரதமர் வேட்பாளராக அறிவித்தால் அவர் ஜெயிக்க முடியுமா என்கிற கேள்வி இப்பொழுது எழுந்துள்ளது. இந்த கேள்வி சுதேசி வேடமிட்டு நடிக்கும் மதவாத வர்ணாசிர கூட்டத்திற்கும் எளுந்துள்ளதுதான் இங்கே வேடிக்கை.

இந்நிலையில், குஜராத்தில் சிறுபான்மை மக்களுக்கு எதிராக நடந்த இனப்படுகொலையை முன்னின்று நடத்திய நரேந்திர மோடிக்கு அமெரிக்கா விசா வழங்க விதிக்கப்பட்டுள்ள தடையை தொடர வேண்டும் என்று அமெரிக்க சர்வதேச மத சுதந்திரத்திற்கான ஆணையம் அமெரிக்க அரசை வலியுறுத்தியுள்ளது.  என்னதான் நரேந்திர மோடி முகத்தில் கரி பூசினாலும் இவருக்கு அமெரிக்க மோகம் குறையவில்லை. அமெரிக்காவில் இருந்து செயல்படும் ஹிந்துத்துவா அமைப்புகள் இவரை எப்படியாவது அமெரிக்க வரவழைத்து விட வேண்டும் என்று பல்வேறு வழிகளில் முயற்சிகளை  செய்கின்றனவாம். 

பாரதிய ஜனதாவின் பிரதமர் வேட்பாளராக இவர் முன்னிறுத்தப்படும் பொழுது அமெரிக்க விசா மறுப்பு என்பது இவரது இமேஜை வெகுவாக பாதிக்கும் என்று ஹிந்துத்துவா இயக்கங்கள் நம்புகின்றன.

சிந்திக்கவும் 

Posted by Unknown 12:31 AM 0 comments

இலங்கை – இனவாதம் முடிவுக்கு வந்துவிட்டதா?

கடந்த ஒன்றரை வருடங்களாக இலங்கை முஸ்லிம்களுக்கு எதிராக தொடர்ச்சியாக நடை பெற்று வந்த இனவாத குரோத பிரச்சாரங்கள் கடந்த ஒரு மாதமாக ஓரளவுக்கு குறைந்திருந்தது.

ஆரம்பத்தில் இருந்தளவுக்கு படு பயங்கரமாக இல்லாவிட்டாலும், ஓரளவுக்கு ஆங்காங்கே முஸ்லிம் எதிர்ப்புப் பிரச்சாரங்கள் நடைபெற்றுக் கொண்டுதான் இருந்தன.

ஆனால் முஸ்லிம் தலைமைகளும், சில இயக்கங்களும் “இனி எல்லாம் முடிவுக்கு வந்துவிட்டது. யாரும் அஞ்சத் தேவையில்லை“ என்ற அடிப்படையில் பிரச்சாரங்களை முன்னெடுத்து வருகின்றார்கள்.

இதற்கான காரணம் என்ன?

பத்திரிக்கைகளில், தொலைக்காட்சிகளில் முஸ்லிம்களுக்கு எதிரான பிரச்சாரங்கள் பற்றிய செய்திகள் குறைவாக இடம்பிடித்தது. இன்னும் சொல்லப் போனால் சில செய்திகள் மீடியாக்களில் இடம் பிடிக்கவே இல்லை எனலாம்.

எது எப்படியோ இனி எல்லாம் முடிந்துவிட்டது என்றொரு சிந்தனைக்கு விரும்பியோ விரும்பாமலோ முஸ்லிம் சமுதாயத்தில் சிலர் தள்ளப்பட்டு விட்டார்கள். அதிலும் இலங்கை முஸ்லிம்களில் மத்ஹபை பின்பற்றுவர்கள் அதிகம். குறிப்பாக ஷாபி மத்ஹபை பின்பற்றும் தப்லீக் ஜமாத்தினர் ஒவ்வொரு ஊரிலும் நிறைந்திருக்கின்றார்கள்.

அதே போல் தவ்ஹீத், ஜமாத்தே இஸ்லாமி என்று பலரும் ஒரு வகையில் இந்த சிந்தனைக்குள் ஈர்க்கப்பட்டுவிட்டார்கள்.

தப்லீக் ஜமாத்தினரைப் பொருத்தவரையில் அகில இலங்கை ஜம்மிய்யதுல் உலமா என்ன முடிவை அறிவிக்கின்றதோ அந்த முடிவில் நிலைத்திருப்பார்கள். குறிப்பாக (இடர்கால) குனூத் ஓதும்படி வேண்டிக் கொண்ட உலமா சபை, பின்னர் அதை நிறுத்தும் படியும் வேண்டிக் கொண்டது.

பிரச்சினை இருக்கும் போது குனூத் ஓத சொன்னார்கள். இப்போது பிரச்சினைகள் முடிவுக்கு வந்துவிட்டது அதனால் ஓத வேண்டாம் என்று அறிவித்துள்ளார்கள். என்ற சிந்தனைக்குள் தாராளமாக தப்லீக் வாதிகள் ஈர்க்கப்பட்டுவிட்டார்கள்.

அதே போல் அமீர் சொன்னால் நாங்கள் எதனையும் செய்வோம் என்ற கருத்துப்பட ஜமாத்தே இஸ்லாமி இயக்கத்தை சார்ந்தவர்கள் தங்கள் காலத்தை கடத்தும் அதே நேரம் அகில இலங்கை ஜம்மிய்யதுல் உலமா சபையில் தங்கள் ஜமாத்தை சார்ந்தவர்களும் இடம்பிடித்திருப்பதினால் உலமா சபை சொல்வதையே தாரக மந்திரமாக ஏற்று செயல்படுவதற்கு இவர்களும் தயாராகிவிட்டார்கள்.

இறுதியாக தவ்ஹீத் பேசும் சகோதரர்களோ இரண்டு வகையினாராக இந்த விஷயத்தில் தங்களை அடையாளம் காட்டுகின்றார்கள்.

முதல்சாரார் ஜம்மிய்யதுல் உலமாவை ஏற்றுக் கொண்டு, நிதி நிறுவனங்களின் கொத்தடிமைகளாக இருக்கக் கூடியவர்கள். இவர்களைப் பொருத்தவரையில் தங்கள் நிதி நிறுவனங்கள் உலமா சபையை நம்பியுள்ளது. அதனால் தாங்களும் உலமா சபை சொல்வதை நம்பி நடக்க தயார் என்று உளப்பூர்வமான முடிவுக்கு வலிந்து ஈர்க்கப்பட்டுவிட்டார்கள்.

இரண்டாவது சாரார் நமக்காக உண்மையில் குரல் கொடுப்பவர்கள் யார்? என்பதை அறிந்து அவர்களின் ஆலோசனைப் படி தங்கள் முடிவை நிர்ணயிப்பவர்கள். இவர்களைப் பொருத்த வரையில் இன்னும் இனவாதம் முடிவுக்கு வரவில்லை. ஏதோ ஒரு பெயரில் மீண்டும் இது தலை தூக்கும் அதை எதிர் கொள்ளும் முறைகளை நாம் தெளிவாக அறிந்து அதன்படி அவற்றை எதிர்கொள்ள வேண்டும் என்ற நிலைபாட்டில் இருக்கின்றார்கள்.

எது எப்படியோ “எல்லாம் முடிந்துவிட்டது” என்ற நிலைக்கு பெரும்பாலான முஸ்லிம்களும், முஸ்லிம் அமைப்புக்களும் விரும்பியோ, விரும்பாமலோ வந்துவிட்டார்கள்.

ஆனால்…. உண்மையில்…..

இனவாதம் முடிவுக்கு வந்துவிட்டதா? என்ற கேள்விக்கான உண்மையான பதில் “இன்னும் முடிவுக்கு வரவில்லை” என்பது தான். உண்மையில் ஒரு மாத காலங்கள் பிரச்சினைகள் குறைந்திருந்ததே தவிர முடிவுக்கு வரவில்லை.

கடந்த ஒரு மாதத்திற்குள்ளும் கூட, கொழும்பு லேடி ரிஜ்வே மருத்துவ மனையில் சிகிச்சைக்காக சென்ற முஸ்லிம் சகோதரியின் ஹிஜாபை அகற்குவதற்கான முயற்சிகள் நடை பெற்றன. இது போல் நாட்டின் பல பகுதிகளிலும் ஆங்காங்கே சம்பவங்கள் நடை பெற்றது. ஆனால் அவை மீடியாக்களில் பெரியளவு இடம் பிடிக்கவில்லை. இதன் காரணமாகவே “எல்லாம் முடிந்துவிட்டது” என்ற முஸ்லிம்களின் போலி எண்ணம் வலுப்பெற்றது என்பது பின்புலக் காரணியாகும்.

எது எப்படியோ அமெரிக்க பயணத்தை முடித்துவிட்டு வந்திருக்கும் பொது பல சேனாவின் சகாக்கள் மீண்டும் பிரச்சினைகளை உண்டாக்கும் விதமாக கடந்த 11ம் தேதி கேகல்லையில் ஒரு பொதுக் கூட்டத்தை நடத்தினார்கள். இதில் அவர்கள் நினைத்த அளவுக்கு ஆதரவு கிடைக்காவிட்டாலும், வழமையான தங்கள் பாணியில் இனவாதத்தை கட்டவிழ்த்து விட்டார்கள்.

அதைத் தொடர்ந்து தாம் நடத்துகின்ற பத்திரிக்கையாளர் சந்திப்புக்களின் மூலம் இஸ்லாத்தையும் முஸ்லிம்களையும் கொச்சைப் படுத்தும் விதமான கருத்துக்களை தெரிவித்து வருகின்றார்கள்.

இலங்கையில் அல்-கைதா, அல்-ஜிஹாத் அமைப்புக்கள் இயங்குகின்றன. என்ற தங்களின் வழமையான கப்ஸாவை தொடர்ந்து கட்டவிழ்த்து விடுகின்றார்கள்.

அதே போல் தவ்ஹீத், வஹாபி இயக்கங்களை தடை செய்ய வேண்டும் என்ற பழைய புராணத்தை மீண்டும் பாட ஆரம்பித்துள்ளார்கள்.

இவைகளெல்லாம் இனவாதம் இன்னும் முடிவுக்கு வரவில்லை என்பதை தெளிவாக உணர்த்துகின்றது. மட்டுமன்றி அனகாரிக தர்மபாலவின் அடிச்சுவட்டை தொடர்ந்து பயணிப்பதற்கு இந்த இனவாதிகள் தயாராகியிருக்கின்றார்கள் என்பதை இந்த செயல்பாடுகள் தெளிவா உணர்த்துகின்றன.

ஆதலினால்…. நமது கடமை……

இப்போது நம் முன்னால் இருக்கின்ற கடமை என்ன? இஸ்லாத்தை அதன் தூய வடிவில் தெளிவாக எத்திவைக்க வேண்டும். குறிப்பாக சிங்கள மொழி மூலமாக பிரச்சாரத்தை பெருவாரியாக நாம் முன்னெடுக்க வேண்டும் என்பதை அனைவரும் உணர்ந்து சிங்கள மொழி மூலமான பிரச்சாரத்திற்கான சிறந்த திட்டமிடலுடன் நமது தஃவா பயணத்தை தொடர்வோமாக.

rasminmisc 

Posted by Unknown 11:48 PM 0 comments

மத நல்லிணக்கம் என்பது சிலை திறப்பதல்ல!

பொதுவாக பல இனத்தவர்களும் சேர்ந்து வாழும் நாடுகளில் பரவலாக பயன்படுத்தப்படும் ஒரு வார்த்தை தான் “மத நல்லிணக்கம்” என்பது. அதிலும் குறிப்பாக பெரும்பான்மை இனத்தவர்களுக்கு மத்தியில் சிறுபான்மையாக வாழும் மக்கள் இந்த வார்த்தையை அதிகமதிகம் பயன்படுத்துவார்கள்.

இனங்களுக்கு இடையில் பிரச்சினைகள், சச்சரவுகள் வருகின்ற நேரத்தில் அதனை சுமுகமான முறையில் தீர்த்துக் கொள்ள வேண்டும் என்பதினால் மத நல்லிணக்கம் என்ற தலைப்பிட்டு இனங்களுக்கிடையிலான ஒற்றுமையை வெளிப்படுத்துவதற்கான சமூக நிகழ்ச்சிகள் நடத்தப்படுகின்றன.

கடந்த சில மாதங்களாக இலங்கையில் ஏற்பட்டுள்ள அசாதாரண இனவாத சூழல் காரணமாக நாடு முழுவதும் முஸ்லிம்களுக்கு எதிரான பௌத்த தீவிரவாத அல்லது இனவாத சிந்தனை கொண்ட ஒரு சிலரினால் பலவிதமான பிரச்சாரங்களும், பிரச்சினைகளும் முன்னெடுக்கப்பட்டு வருகின்றன.

மத நல்லிணக்கத்தின் பேரால்…….

இந்நிலையில் இனங்களுக்கு இடையில் பிரச்சினைகள் தோற்றம் பெறாமல் இருக்கவும், ஏற்கனவே உருவாகிய பிரச்சினைகளை முடிவுக்கு கொண்டுவர வேண்டும் என்ற அவாவிலும் சிலர் “மத நல்லிணக்கம்” என்ற பெயரில் இஸ்லாத்திற்கு முரனான பலவிதமான காரியங்களில் சர்வ சாதாரணமாக ஈடுபடுவதை அவதானிக்க முடிகின்றது.

இவ்வளவு காலமாக நமது சமுதாயம் செய்யாத அல்லது செய்யவும் நினைக்காத பல காரியங்களை தற்காலத்தில் சர்வ சாதாரணமாக மத நல்லிணக்கத்தின் பேரால் பலரும் செய்து வருவது கவலைக்குறிய விஷயமாகும்.

• பன்சலைகளை நிறுவிக் கொடுப்பது.
• பன்சலைகளுக்கு தாராளமாக உதவி ஒத்தாசைகள் செய்வது.
• பன்சலைகளுக்கு பெயின்ட் அடிப்பது உள்ளிட்ட அடிப்படை வசதிகளை ஏற்படுத்துவது.
• பௌத்த தேரர்களுக்கு வாழ்வாதார உதவிகள் வழங்குவது.
• வெசாக், பொசன் போன்ற பௌத்த மக்கள் புனிதமாக கருதும் நாட்களில் உணவு (தன்சல்) கொடுப்பது.
• சிங்கள புத்தாண்டு விழாக்களை முஸ்லிம்களே முதன்மைப்பட்டு நடத்துதல்.

போன்ற காரியங்களை மத நல்லிணக்கம் என்று தற்காலத்தில் முன்னுரிமை கொடுத்து நமது சமுதாயம் செய்து வருகின்றதை நாம் கண்கூடாக கண்டு வருகின்றோம்.

கடந்த சில நாட்களுக்கு முன்பு கலேவெலயில் மத நல்லிணக்கம் என்ற பெயரில் முஸ்லிம்களும், பௌத்த மக்களும் சேர்ந்து பணம் சேகரித்து சிலை ஒன்றை ஸ்தாபித்து திறந்து வைத்த அவலமும் நடந்தேறியுள்ளது.

கலேவல, பட்டிவெல படிகனா புராதன ரஜமகா விகாரையின் விகாராதிபதியான மாவுனாவே சுமனதிஸ்ஸ தேரரின் வழிகாட்டலின் பேரில் பட்டிவெல ‘சக்தி மித்துரு’ நலன்புரி நிலையத்தினால் இந்த புத்தர் சிலை நிர்மான வேலைகள் முன்னெடுக்கப்பட்டுள்ளன. அத்துடன் குறித்த சிலையும் விகாராதிபதியான மாவுனாவே சுமனதிஸ்ஸ தேரரின் தலைமையில் திறந்து வைக்கப்பட்டுள்ளது.

சிங்களவர்கள் மற்றும் முஸ்லிம்கள் இணைந்து சுமார் நான்கு இலட்சம் ரூபா செலவில் இதனை நிர்மாணித்துள்ளார்கள்.

ஆக மொத்தத்தில் மத நல்லிணக்கத்திற்காக மார்க்கத்தையே விட்டுக் கொடுக்கும் சமுதாயமாக நமது இன்றைய இலங்கை வாழ் முஸ்லிம் சமுதாயம் மாறிவிட்டது கவலைக்குறிய விஷயமே!

ஒரு நோயாளிக்கு உதவுவதும், வாழ வழியில்லாதவனுக்கு வாழ்வாதார உதவியளிப்பதும் இஸ்லாம் காட்டிய வழி முறைதான் அந்த அடிப்படையில் ஒருவருக்கு வாழ்வாதார உதவி வழங்கினாலோ அல்லது நோயாளியாக இருப்பவருக்கு உதவி செய்தாலோ அது மார்க்கத்தில் தடுக்கப்பட்ட ஒன்றல்ல. மாறாக இதுவரைக்கும் இது தொடர்பாக சிந்தனை கூட இல்லாதவர்கள் மத நல்லிணக்கத்தின் பேரால் பன்சலைகளையும், சிலைகளையும் நிர்மாணித்துக் கொடுப்பதை எவ்விதத்தில் ஏற்றுக் கொள்ள முடியும்?

பன்சலையில் நோன்பு திறந்து, தொழுகை நடத்திய முஸ்லிம் பிரமுகர்கள்.

முஸ்லிம்களுக்கு எதிரான இனவாதம் முற்றிப் போயிருந்த நேரத்தில் சில முஸ்லிம் பிரமுகர்கள் பன்சலைகளில் நோன்பு திறந்தார்கள். இன்னும் சிலரோ பன்சலைகளில் தொழுகையே நடத்தினார்கள்.

என்னே மத நல்லிணக்கம்?

இப்படி இனவாதத்திலிருந்து முஸ்லிம்களை காப்பாற்ற வேண்டும் என்ற எண்ணத்தில் “மத நல்லிணக்கம்“ என்ற பெயரால் இஸ்லாமிய மார்க்கத்தை விட்டு குப்ருக்கு செல்லும் இவர்களை யார் நரகத்தை விட்டும் பாதுகாப்பது?

இனவாதத்திலிருந்து முஸ்லிம்களை காப்பாற்றுவதை விட மிக மிக முக்கியமானது நரகத்திலிருந்து அனைவரையும் பாதுகாப்பதென்பது. ஆனால் நமது சமுதாயத் தலைவர்களுக்கு மார்க்கத்தை விட மத நல்லிணக்கம் தான் பெரிதாய்ப் போய்விட்டது.

அது போல் சிங்கள புத்தாண்டை முன்னிட்டு பண்டாரகமயை சேர்ந்த பௌத்தர்கள், அட்டுலுகமயைச் சேர்ந்த முஸ்லிம்களுக்கு இராப்போசன விருந்தளித்திருக்கின்றார்கள். இதில் கலந்து கொண்ட அட்டுலுகம முஸ்லிம் பிரதிநிதிகள் குத்து விளக்கேற்றி நிகழ்வை ஆரம்பித்த செய்தி இந்த வார விடிவெள்ளிப் பத்திரிக்கையில் பிரசுரிக்கப்பட்டுள்ளது.

யார் இன்னொரு கூட்டத்தாருக்கு ஒப்பாக நடக்கின்றார்களோ அவர்கள் அக்கூட்டத்தையே சார்ந்தவர்கள் என்பது நபிமொழி.

இன்னொரு சமுதாயத்தவர்களின் மத கிரியைகளை பின்பற்றுவது நம்மை இஸ்லாத்தை விட்டும் வெளியேற்றிவிடும் என்று நபியவர்கள் கூறியிருக்கும் போது நமது சமுதாய பிரமுகர்கள் என்போர் தாராளமாக அவர்களுடன் சேர்ந்து நமது மார்கத்திற்கு முரனான பல செயல்பாடுகளில் பங்கெடுப்பதைக் காண்கின்றோம்.

மத நல்லிணக்கம் என்பது மார்க்கத்தை விட்டுக் கொடுப்பதல்ல!

உண்மையில் மத நல்லிணக்கம் என்பது நாம் ஏற்றுக் கொண்டுள்ள தூய இஸ்லாமிய மார்க்கத்தை விட்டுக் கொடுத்துவிட்டு மற்ற மத சம்பிரதாயங்களை நமது வாழ்வில் ஏற்று நடப்பதல்ல. நமது மார்க்கத்தை நாம் உறுதியாக பின்பற்றுவதுடன் மாற்று மத அன்பர்களுக்கும் நமது மார்க்கத்தை தூய முறையில் கற்றுக் கொடுக்க வேண்டும்.

இஸ்லாமிய மார்க்கத்தை உண்மையில் தூய என்னத்துடன் ஏற்றுக் கொண்டவர்கள் என்றால் அவர்கள் நன்மையை ஏவி தீமையை தடுக்கின்ற கூட்டத்தினராகவே இருக்க வேண்டுமே தவிர தீமைக்கு துணை செல்பவர்களாக இருக்கக் கூடாது என்று இறைவன் தனது திருமறைக் குர்ஆனில் தெளிவாகவே குறிப்பிட்டுக் காட்டுகின்றான்.

நன்மையை ஏவி, தீமையைத் தடுத்து நல் வழியை நோக்கி அழைக்கும்சமுதாயம் உங்களிடம் இருக்க வேண்டும். அவர்களே வெற்றி பெற்றோர். (அல்குர்ஆன் 3 : 104)

இஸ்லாமிய மார்க்கத்தை பிரச்சாரம் செய்யும் போது எவ்வித விட்டுக் கொடுப்பும் காட்டாமல் தெளிவாகவே எடுத்துரைக்க வேண்டும். அது போல் இணை வைக்கின்ற காரியங்களில் ஈடுபடாமல், இணை வைப்பவர்களை புறக்கணிக்க வேண்டும் என்று இறைவன் தெளிவாகவே திருமறைக் குர்ஆனில் குறிப்பிடுகின்றான்.

உமக்குக் கட்டளையிடப் பட்டதைத் தயவு தாட்சண்யமின்றி எடுத்துரைப்பீராக!இணை கற்பிப்போரைப் புறக்கணிப்பீராக! (அல்குர்ஆன் 15 : 94)

நபி (ஸல்) அவர்கள் இஸ்லாமிய மார்க்கத்தைப் பிரச்சாரம் செய்யும் போது நபியை எதிர்த்த கூட்டத்தினர் ஒரு கட்டத்தில் நபியுடன் ஓர் ஒப்பந்தம் செய்ய முன்வந்தார்கள். அந்த ஒப்பந்தத்தில் சில நாட்கள் அவர்கள் அல்லாஹ்வை வணங்குவதாகவும், சில நாட்கள் சிலைகளை முஸ்லிம்கள் வணங்குங்கள் என்றும் கோரிக்கை வைத்தார்கள்.

இது தொடர்பாக இறைவன் குர்ஆன் வசனத்தை இறக்கி வைத்து அவர்களின் கோரிக்கையை மறுத்ததுடன், எக்காரணம் கொண்டும் அவர்களின் மார்க்கத்தை முஸ்லிம்கள் உள்வாங்கக் கூடாது என்பதை தெளிவாகவே அறிவித்தான்.

(ஏக இறைவனை) மறுப்பவர்களே!” நீங்கள் வணங்குவதை நான் வணங்க மாட்டேன். நான் வணங்குபவனை நீங்கள் வணங்குவோரில்லை. நீங்கள் வணங்குவதை நான் வணங்குபவன் அல்லன். நான் வணங்குபவனை நீங்கள் வணங்குவோரில்லை. உங்கள் மார்க்கம் உங்களுக்கு. என் மார்க்கம் எனக்கு” எனக் கூறுவீராக! (அல்குர்ஆன் : 109 : 1,2,3,4,5,6)

மேற்கண்ட வசனத்தின் மூலம் எக்காரணம் கொண்டும் “மத நல்லிணக்கம்” என்ற பெயரில் நமது மார்கத்தை விட்டுக் கொடுக்கும் காரியத்தில் ஈடுபடக் கூடாது என்பதை தெளிவாக அறிந்து கொள்ள முடியும்.

அன்பான அழைப்பு.

அன்பின் சகோதரர்களே! சமுதாய செயல்பாட்டாளர்களே!

முஸ்லிம்களாக வாழுகின்ற நாம் எக்காரணம் கொண்டும் நமது ஏகத்துவக் கொள்கையை விட்டும் வழி தவறிவிடக் கூடாது. மரணிக்கின்ற வரைக்கும் இத்தூய கொள்கையில் உறுதியாக இருந்து மரணிக்க வேண்டும். “மத நல்லிணக்கம்” என்ற பெயரில் நமது கொள்கைகளை விட்டுக்கொடுத்து, ஈமானை இழந்து, நாளை மறுமையிலே நாம் நஷ்டமடைந்து விடக் கூடாது.

ஆகையினால், உண்மை இஸ்லாத்தை பின்பற்றி தூய முஸ்லிம்களாக மரணிக்க வல்ல இறைவன் அருள் புரிவானாக!

நன்றி - raminmisc 

Posted by Unknown 4:32 PM 0 comments

தேசிய ஷுரா கவுன்சில் உருவாக்க முயற்சி- சில புரிதல்கள்.

“அருகிலிருக்கும் கருப்பு ஆட்டை அங்காடியில் தேடும் கதை”

கடந்த சில நாட்களாக இலங்கை மட்டத்தில் அனைத்து இயக்கத்தையும் ஒன்றிணைத்து முஸ்லிம்களின் உரிமைகளுக்காய் போராட வேண்டும், முஸ்லிம் உரிமைகளை பாதுகாக்க வேண்டும் என்ற கருத்துப்பாட்டின் கீழ் தேசிய ஷுரா கவுன்சில் என்ற பெயரில் ஒரு குடையின் கீழ் அனைத்து இயக்கப் பிரமுகர்களும் என்ற மகுடம் சூட்டி ஒரு அமைப்பை உருவாக்குவதற்கான முஸ்தீபுகள் ஒரு சில தரப்பால் முடுக்கிவிடப்பட்டுள்ளது.

இலங்கையில் முஸ்லிம்களுக்கு மத்தியில் இருக்கும் அனைத்துத் தரப்பு இயக்கங்களையும், இயக்க அங்கத்தவர்களையும் ஒன்றிணைத்ததாக உருவாக்கப்படவிருக்கும் இந்த தேசிய ஷுரா சபை என்பது உண்மையில் இலங்கைக்கு தேவையானதா?  என்பது ஒரு புறமிருக்க தேசிய ஷுரா சபை உருவாக்கப்படும் நோக்கம் உண்மையில் நிறைவேற்றப்படுமா? என்றொரு கேள்வி பதிலில்லாமல் காலத்திற்கும் கேள்விக் குறியுடன் இருக்கப் போகின்றது என்பதில் சந்தேகமில்லை.

இது தொடர்பாக நாம் சற்று விரிவாகவே விளங்கிக் கொள்ள வேண்டும்.

ஆம் தேசிய ஷுரா சபை என்றொன்று உருவாக்கப்பட வேண்டும் என்ற எண்ணம் ஏற்பட்டதற்கான பின்னனியாக இருப்பது இலங்கையில் ஏற்பட்டுள்ள இனவாத பிரச்சினையாகும்.

இனவாதப் பிரச்சினையை மையமாக வைத்து உருவாக்கப்படும் இச்சபை மூலம் இனிவரும் காலங்களில் முஸ்லிம் உரிமைகளுக்காக குரல் கொடுக்கவிருப்பதாக அதன் உருவாக்குணர்கள் தெரிவிக்கின்றார்கள்.

கடந்த ஒரு வருடத்திற்கும் மேலாக இலங்கை முஸ்லிம்களுக்கு எதிராக பலவிதமான இனவாத செயல்பாடுகள் பௌத்த தீவிரவாத இயக்கங்களினால் கட்டவிழ்த்து விடப்பட்டமையை இலங்கை முஸ்லிம்கள் யாரும் மறந்திருக்கமாட்டார்கள்.

பத்துக்கும் மேற்பட்ட பள்ளிகள் தாக்கப்பட்டமை, ஹிஜாபுக்கு எதிரான பிரச்சாரங்கள் முன்னெடுக்கப்பட்டமை, தாடி, கத்னா, ஷரீஆ சட்டம், காதி நீதி மன்றங்கள் என்று இஸ்லாமியர்களின் மத நடவடிக்கைகள் தொடர்பான பலவிதமான செயல்பாடுகளுக்கும் பௌத்த இனவாதிகள் பிரச்சினைகளை உண்டாக்கினார்கள்.

ஹழால் பிரச்சினை தொடர்பில் அகில இலங்கை ஜம்மிய்யதுல் உலமா பல சிக்கள்களை சந்தித்து, இறுதியில் பௌத்த அரசாங்கத்திற்காக அதனை தாரை வார்த்தது.

நிலைமை இப்படியிருக்க……

இப்போது தேசிய ஷுரா சபையின் தேவை உணரப்படுகின்றதாம்.

ஹழால் பிரச்சினைக்கு முன்பு வரை அனைவரும் “அகில இலங்கை ஜம்மிய்யதுல் உலமா சபை” யின் கீழ் ஒன்று படுவோம் என்று பேசிய பலர் இப்போது தேசிய ஷுரா சபை தொடர்பில் பேசியும் எழுதியும் வருகின்றார்கள். ஒரு வேலை ஜ. உலமா அன்று இனித்து இப்போது கசப்பாகக் கூட இருக்கலாம்.

ஜம்மிய்யதுல் உலமா என்ற பெயரில் இவ்வளவு காலம் இவர்கள் செய்யாததை தேசிய ஷுரா என்ற பெயரில் இனிமேல் செய்வார்கள் என்று எந்த புத்திசாலியும் நம்பமாட்டான்.

முஸ்லிம்களுக்கு எதிரான இனவாத செயல்பாடுகளில் பொது பல சேனா என்ற இனவாத இயக்கம் ஈடுபட்ட வேலைகளில் தனி இயக்கமாக இருந்து அதனை தடை செய்யும்படி ஸ்ரீ லங்கா தவ்ஹீத் ஜமாத் (SLTJ) அரசுக்கு கோரிக்கை வைத்தது. ஆனால் இன்று தேசிய ஷுரா பற்றி பேசும் யாராவது பொது பல சேனாவை தடை செய்யும் படி கோரிக்கை வைக்க வாய் திறந்தார்களா?

மஷுரா செய்து முடிவெடுக்க வேண்டும் என்ற கருத்துப்பட திருமறைக் குர்ஆனில் உள்ள வசனங்களை எடுத்துக் காட்டிவிட்டு இதனடிப்படையில் தேசிய ஷுராவில் அனைவரும் இணைய வேண்டும் என்ற கோரிக்கையை வைத்தால் மாத்திரம் போதாது. தேசிய ஷுராவை வழி நடாத்துவதற்கான அடிப்படை கொள்கையாக திருமறைக் குர்ஆனும், நபியவர்களின் வழிகாட்டலும் எடுத்துக் கொள்ளப்பட வேண்டும்.

ஆனால் தேசிய ஷுரா என்ற பெயரில் அமைக்கப்படவிருக்கும் இந்த ஷுரா சபைக்கும் குர்ஆன், சுன்னாவுக்கும் எவ்வித தொடர்பும் இல்லை என்பதை நாம் தெளிவாக அறியலாம். காரணம் குர்ஆன் சுன்னாவை குழி தோண்டிப் புதைக்கும் பல இயக்கங்கள் இதில் இணைவதற்கான இணக்கப்பாட்டிற்கு வந்துள்ளன.

அதே போல் தேசிய ஷுரா கவுன்சில் உருவாக்கப்படுவதன் நோக்கங்களில் பிரதானமானது முஸ்லிம்களின் உரிமைக்காக ஒன்றிணைந்து போராடுவது என்று சொல்லப்படுகின்றது. இது சாத்தியமானதா? என்றால் இல்லவே இல்லை என்பதே பதிலாகக் கிடைக்கும்.

பொது பல சேனா முஸ்லிம்களுக்கு எதிரான பிரச்சாரத்தை முன்னெடுக்கும் போது அவர்களுக்கு எதிராக வாய் திறந்து பேசவே பயப்பட்டவர்கள் முஸ்லிம்களின் உரிமைக்காக குரல் கொடுப்பார்கள் என்று நம்பினால் கடைசியில் ச் சீ இந்தப் பழம் புளிக்கும் என்ற நிலைக்குத் தான் நாம் தள்ளப்படுவோம்.

தேசிய ஷுரா சபையில்… “இலங்கையில் உள்ள இஸ்லாமிய அமைப்புகள் பலவும் ஒன்றிணைகின்றன” என்று அதன் அமைப்பாளர்களில் ஒருவர் நம்மிடம் கூறிய போது “ஷீயாக்கள் இதில் அடக்கமா?” என்று கேட்டோம். அப்போது “இல்லை” என்றவர்களிடம் “கப்ரு வணங்கும் தரீக்காக்கள் இதில் இணைகின்றனவா?” என்று கேட்ட போது “ஆம்” என்றார்.

இலங்கையில் தற்போது ஏற்பட்டுள்ள இனப்பிரச்சினையில் முஸ்லிம்களை காட்டிக் கொடுத்து குளிர் காய்பவர்களில் முதல் இடம் வகிப்பது ஷீயா சிந்தனை கொண்ட கப்ரு வணங்கும் தரீக்கா வாதிகள் என்பது ஷுரா கவுன்சில் அமைப்பாளர்களுக்கு தெரியாத விஷயமல்ல.

அப்படியிருக்க இந்த கப்ரு வணங்கிகளையும் கொண்டமைக்கப்படும் ஷுரா சபையினால் இலங்கை முஸ்லிம்களுக்கு என்ன நலவு நடக்கப் போகின்றது?

தென்னந் தோப்பு மா மரம் தேங்காய் காய்க்காது என்பது இவர்களுக்கு தெரியவில்லையா என்ன?????

மண்ணுக்குக் கீழ் உள்ளவற்றையும், வானத்திற்கு மேல் உள்ளவற்றையும் பற்றி மாத்திரம் பேசும் தப்லீக் ஜமாத்.

அடுத்த தேர்தலில் ஆட்சி பிடிக்க நினைக்கும் ஜமாத்தே இஸ்லாமி.

அல்லாஹ்வை வணங்குவதை தடுத்து மரணித்தவர்களை வணங்கும் ஷீயாக்களான தரீக்கா வாதிகள். என குர்ஆன், சுன்னாவுக்கு கொஞ்சமும் தொடர்பில்லாதவர்களுடன் நாமும் ஷுரா கவுன்சில் என்ற பெயரில் சேர்ந்தால் என்னவாகும் என்று எண்ணிப் பாருங்கள்.

கருப்பு ஆட்டை நமக்குள்ளே வைத்துக் கொண்டு வெளியில் தேடுவதா?

கூட இருப்பவனே காட்டிக் கொடுப்பான் அவனையும் வைத்துக் கொண்டு நாம் மஷுரா செய்வதா?

இவற்றை நினைத்தால் சிரிப்பதா? அழுவதா? என்றே புரியவில்லை.

தேவைபடும் போது புரிதல்கள் தொடரும்….

rasminmisc 

Posted by Unknown 12:11 AM 0 comments

அமைச்சர்களின் ஒரு மதிய சாப்பாடு பில் ரூ87,020..! அம்மாடியோவ்!

வறட்சியை பார்க்க போன தமிழக அமைச்சர்களின் ஒருநேர மதிய சாப்பாடு பில் ரூ87,020..! 

சிவகங்கை மாவட்டத்தில் வறட்சியைப் பார்க்க சென்ற தமிழக அமைச்சர்கள் குழுவின் மதிய உணவு செலவு மட்டும் ரூ87ஆயிரத்து 20.. இதை உள்ளாட்சி அமைப்புகள் பகிர்ந்து கொண்டு டிடி அனுப்ப மாவட்ட ஆட்சியர் உத்தரவும் பிறப்பித்திருக்கிறார். 

போதுமான பருவமழை இல்லை.. இதனால் தமிழக மாவட்டங்களில் விவசாயம் பொய்த்துவிட்டது. வறட்சி பாதித்த பகுதிகளை நிதி அமைச்சர் ஓ. பன்னீர்செல்வம் தலைமையிலான வறட்சி நிவாரணக் குழு பார்வையிட்டு வருகிறது 
இக்குழுவினர் கடந்த 16-ந் தேதி சிவகங்கை மாவட்டத்தில் இளையான்குடி பகுதியில் மட்டும் ஆய்வு செய்துவிட்டு ராமநாதபுரத்துக்கு சென்றனர். 

சிவகங்கையில் இளையான்குடியில் மட்டும் வறட்சியை ஆய்வு செய்த அமைச்சர்கள் குழுவினரின் மத்திய உணவு பில் தொகை ரூ87 ஆயிரத்து 20 என்று மாவட்ட நிர்வாகம் தெரிவித்திருக்கிறது. 

இந்தத் தொகையை மாவட்டத்தில் உள்ள 12 ஊராட்சி ஒன்றியங்கள், 12 பேரூராட்சிகள், 3 நகராட்சிகள் பகிர்ந்து அளிக்க வேண்டும் என மாவட்ட ஆட்சியர் ராஜாராமன் உத்தரவிட்டுள்ளார். 

பேரூராட்சிகள், ஊராட்சி ஒன்றியங்கள் ஆகியவை தலா ரூ2,417, நகராட்சிகள் தலா ரூ9,670 தொகையை மாவட்ட ஆட்சியர், சிவகங்கை என்ற பெயருக்கு டிடி எடுத்து உடனே அனுப்பவும் உத்தரவிடப்பட்டுள்ளது. வறட்சியைப் பார்க்க போன அமைச்சர்களின் ஒருநேர சாப்பாடு பில் சுமார் 1 லட்சமா? என்னத்த சொல்றது!! 

Posted by Unknown 12:36 AM 0 comments