நபிதோழர்கள் கவ்ஸர் தடாகத்தை விட்டு தடுக்கப்படுவார்களா?

கவ்ஸர் தடாகத்திலிருந்து ஸஹாபாக்கள் விரட்டப்படுவார்கள் என்று எந்த அடிப்படையில் நீங்கள் சொல்கிறீர்கள்?

பதில்  - இவ்வாறு நாம் இட்டுக்ககட்டி சுயமாகக் கூறவில்லை. அல்லாஹ்வின் தூதர் (ஸல்) அவர்கள் சொன்னதன் அடிப்படையில் இவ்வாறு சொல்கிறோம். 

அல்லாஹ்வின் தூதர் (ஸல்) அவர்கள் (ஒருமுறை மக்களுக்கு) உரை நிகழ்த்தினார்கள். (அதில்), "மக்களே! நீங்கள் (மறுமையில்) செருப்பணியாதவர்களாகவும், நிர்வாணமானவர்களாகவும், விருத்தசேதனம் செய்யப்படாதவர்களாகவும் அல்லாஹ்விடம் கொண்டுவரப்படுவீர்கள்'' என்று கூறிவிட்டுப் பிறகு "எழுதப்பட்ட ஏடு சுருட்டப்படுவதைப் போல் நாம் வானத்தைச் சுருட்டும் அந்நாளில், நாம் முதலில் எவ்வாறு படைக்கத் தொடங்கினோமோ அவ்வாறே நாம் மீண்டும் (அவர்களுக்கு உயிர் கொடுத்து) படைப்போம்'' எனும் (21:104ஆவது) இறைவசனத்தை இறுதிவரை ஓதினார்கள். பிறகு, "அறிந்து கொள்ளுங்கள்: மறுமை நாளில் (சொர்க்கத்தின்) ஆடை அணிவிக்கப்படும் முதல் நபர் (இறைத்தூதர்) இப்ராஹீம் அவர்கள்தாம். அறிந்து கொள்ளுங்கள்: என் சமுதாயத்தாரில் சிலர் கொண்டு வரப்பட்டு, இடப் பக்கத்(திலுள்ள நரகத்)திற்குக் கொண்டு செல்லப்படுவார்கள். அப்போது நான், "என் இறைவா! (இவர்கள்) என் தோழர்களில் சிலர்'' என்று சொல்வேன். அதற்கு "இவர்கள் உங்களு(டைய மரணத்து)க்குப் பின் என்னவெல்லாம் புதிது புதிதாக உருவாக்கினார்கள் என்று உங்களுக்குத் தெரியாது'' என்று கூறப்படும். அப்போது நான், நல்லடியார் (ஈசா நபி) சொன்னதைப் போன்று, "நான் அவர்களுடன் இருந்த வரையில் அவர்களைக் கண்காணிப்பவனாக இருந்தேன். நீ என்னைத் திரும்ப அழைத்துக் கொண்ட போது நீயே அவர்களைக் கண்காணிப்பவனாக இருந்தாய்!'' என்று பதிலளிப்பேன். அதற்கு, "இவர்களை நீங்கள் பிரிந்ததிலிருந்து, இவர்கள் தங்கள் குதிகால் (சுவடு)களின் வழியே தம் மார்க்கத்திலிருந்து வெளியேறிக் கொண்டு தான் இருந்தார்கள்'' என்று கூறப்படும். 

அறிவிப்பவர்: இப்னு அப்பாஸ் (ரலி) நூல்: புகாரி 4625, 4740, 6526, 6572, 6582, 6585, 6586, 7049 
முஸ்லிம் 365, 4247, 4250, 4259, 5104 

நபிகள் நாயகம் (ஸல்) அவர்கள் இப்படி தெளிவாக சொல்லி இருந்தும் இது நபித்தோழர்களைக் குறிக்காது. அவர்களின் உம்மத்தினர் அனைவரையும் குறிக்கும். அனைத்து உம்மத்துகளிலும் மேற்கண்டவாறு நடந்து கொண்டவர்களையே குறிக்கும் குதர்க்கமான விளக்கம் கொடுக்கின்றனர். 

சில அறிவுப்புகளில் உம்மதீ என் சமுதாயத்தினர் என்று நபிகள் நாயகம் (ஸல்) கூறுவார்கள் என்று கூறப்பட்டுள்ளது.

சுனன் நஸயீ அல்குப்ராவில் 11095வது ஹதீஸில், நபி (ஸல்) அவர்கள் "அஸ்ஹாபீ' என்பதற்குப் பதிலாக "உம்மத்தீ - என்னுடைய சமுதாயமே' என்று சொன்னதாக இடம் பெற்றுள்ளது. 

நபித்தோழர்கள் பித்அத் செய்தார்கள் என்று வந்து விடக் கூடாது என்பதற்காக இவ்வாறு சமாளிக்கின்றனர். 

என் சமுதாயத்தினர் என்று சில அறிவிப்புக்களிலும் என் தோழர்கள் என்று சில அறிவிப்புக்களிலும் வந்தால் இதை எப்படி புரிந்து கொள்வது என்ற தெளிவு இல்லாமல் இப்படி வாதிடுகின்றனர். 

உம்மத் என்பதில் ஸஹாபாக்களும் அடங்குவார்கள். மற்ற மக்களும் அடங்குவார்கள். ஆனால் ஸஹாபி என்பதில் அனைத்து மக்களும் அடங்க மாட்டார்கள். 

உதாரணமாக, ஒரு செய்தியில், "வன விலங்கு ஒன்று மனிதனைக் கடித்து விட்டது' என்று இடம் பெறுவதாக வைத்துக் கொள்வோம். 

அதே செய்தியை மற்றொரு இடத்தில் சொல்லும் போது, சிங்கம் ஒன்று மனிதனை கடித்ததாகக் கூறப்படுகிறது என்றால் இப்போது முன்னர் இடம் பெற்ற செய்தியில் உள்ள வன விலங்கு, சிங்கம் தான் என்பது தெளிவாகி விட்டது. 

வன விலங்கு என்பதால் அது புலி, சிறுத்தை, ஓநாய் எல்லாவற்றையும் குறிக்கும்; எனவே கடித்தது சிங்கம் அல்ல என்று யாரும் கூற மாட்டார்கள். ஏனென்றால், முதல் செய்தியில் வன விலங்கு என்று பொதுவான வார்த்தை இடம் பெற்றாலும், அடுத்த செய்தியில் சிங்கம் என்ற குறிப்பான வார்த்தை வந்து விட்டதால் இங்கு வேறு அர்த்தம் கொடுக்க வழியே இல்லை. 

சில ஹதீஸ்களில் உம்மத் என்ற வார்த்தை இடம் பெற்றாலும் அது ஸஹாபாக்களைக் குறிக்காது என்று கூற முடியாது. ஏனென்றால் ஸஹாபாக்களும் உம்மத்தில் உள்ளவர்கள் தான். உம்மத் என்று பொதுவான வார்த்தை இடம் பெறும் ஹதீசுக்கு ஸஹாபி என்ற வார்த்தை இடம் பெறும் ஹதீஸ் விளக்கமாக அமைகின்றது. எனவே இந்த அடிப்படையிலும் இந்த ஹதீஸில் கூறப்படுவது நபித்தோழர்கள் தான் என்பது உறுதியாகின்றது. 

இன்னும் இதை விடத் தெளிவாகவே முஸ்லிமில் இடம் பெறும்  (4259) ஹதீஸில், "என்னிடம் தோழமை கொண்டவர்களில் சிலர்' என்று மிகத் தெளிவாகக் குறிப்பிடுகின்றார்கள். இதன் மூலம் அல்லாஹ்வின் தூதர் (ஸல்) அவர்கள் அந்த ஹதீஸில் குறிப்பிடுவது, ஸஹாபாக்களைத் தான் என்பது உறுதியாகின்றது. 

இது தொடர்பான சில ஹதீஸ்களில் அவர்கள் நபிகள் நாயகத்துக்குப் பின்னர் மதம் மாறிச் சென்றதாகக் கூறப்பட்டுள்ளது. நபித்தோழர்கள் மதம் மாறிச் சென்று இருப்பார்களா? எனவே மதம் மாறிச் சென்றவர்கள் என்ற வாசகம் காரணமாக நபித்தோழர்கள் அல்லாத் மற்றவர்களைத்தான் இது குறிக்கிறது எனவும் அவர்கள் வாதிடுகின்றனர். 

இதுவும் அறியாமை காரணமாக வைக்கப்படும் வாதமாகும். 

நபித்தோழர்கள் என்று கருதப்பட்டவர்களிடம் மத மாற்றம் நிகழ்ந்துள்ளதை இஸ்லாமிய வரலாறு தெரிந்தவர்கள் மறுக்க மாட்டார்கள். 

நபி (ஸல்) அவர்கள் இறந்தவுடனேயே மத மாற்றம் நடந்தது. இதை புகாரி 1400வது ஹதீஸிலும் வேறு பல ஹதீஸ்களிலும் காணலாம். 

அபூபக்ர் (ரலி) அவர்களின் ஆட்சிக் காலத்தில், "நபி (ஸல்) அவர்கள் இருக்கும் போது ஜகாத் கொடுத்தோம். அவர்கள் இறந்து விட்டார்கள். இனிமேல் ஜகாத் கொடுக்க மாட்டோம்'' என்று அரபிகள் மறுத்து மதம் மாறியுள்ளனர். 

இந்த அரபிகள் யார்? நபிகள் நாயகம் (ஸல்) அவர்கள் காலத்தில் வாழ்ந்தவர்கள் தான் இந்த அரபிகள். இவர்களை தாபியீன்கள் என்று கூற முடியாது. காரணம் தாபிஃ என்றால் ஸஹாபாக்களைச் சந்தித்தவர்கள் என்று அர்த்தம். நபிகள் நாயகம் (ஸல்) அவர்களது காலத்தில் வாழ்ந்தவர்கள் தான் ஜகாத் கொடுக்க மறுக்கிறார்கள். எனவே அவர்களை ஸஹாபாக்கள் என்று தான் குறிப்பிடுவோம். 

நபி (ஸல்) அவர்களை முஸ்லிமாகச் சந்தித்து, அவர்கள் இறந்த பின்னர் மதம் மாறியிருந்தாலும் நபியவர்களைப் பொறுத்த வரை அவர்கள் ஸஹாபிகள் தான். ஏனென்றால் நபி (ஸல்) அவர்களின் மரணத்திற்குப் பிறகு தான் மதம் மாறுகிறார்கள். எனவே மதம் மாறியிருந்தாலும் அதை நபி (ஸல்) அவர்கள் அறிந்திராத காரணத்தால் தான், "என்னுடைய தோழர்கள்'' என்று அழைக்கிறார்கள். 

உங்களுடைய மரணத்திற்குப் பிறகு அவர்கள் மதம் மாறியது உங்களுக்குத் தெரியாது என்று மறுமையில் நபி (ஸல்) அவர்களுக்கு அறிவிக்கப்படுகின்றது. எனவே மதம் மாறியவர்களை நபித்தோழர்கள் என்று எப்படிக் குறிப்பிடலாம் என்ற வாதம் அர்த்தமற்றதாகும். 

இந்தக் கருத்தில் வரும் புகாரி 3349, 3347, 4625, 4740, 6526, முஸ்லிம் 5104 ஆகிய ஹதீஸ்களில் நபி (ஸல்) அவர்கள், "ஈஸா (அலை) அவர்கள் சொன்ன வாக்குமூலத்தை நானும் சொல்லி விடுவேன்' என்று நபிகள் நாயகம் சொல்வதாக கூறப்படுகிறது. 

அதாவது திருக்குர்ஆன் 5:117 வசனத்தில் உள்ளது போன்று, "நான் அவர்களுடன் இருக்கும் போது அவர்களைக் கண்காணிப்பவனாக இருந்தேன். என்னை நீ கைப்பற்றியதும் நீயே அவர்களைக் கண்காணிப்பவனாக இருந்தாய்'' என நபி (ஸல்) அவர்கள் கூறுவார்கள் என்ற கருத்து இந்த ஹதீஸில் இடம் பெறுகின்றது. 

இந்த வாக்குமூலத்தைப் பாருங்கள். "நான் அவர்களுடன் இருக்கும் போது நான் அவர்களைக் கண்காணித்தேன்' என்றால் அவர்கள் இருக்கும் போது உடனிருந்த மக்கள் யார்? நபித்தோழர்கள் தான் என்பது திட்டவட்டமாகத் தெரிகின்றது. அப்படியிருக்கையில் இந்த ஹதீஸ் நபித்தோழர்களைக் குறிக்கவில்லை என்று எப்படிச் சொல்ல முடியும்? மனோ இச்சையைப் பின்பற்றித் தான் இவ்வாறு வாதிட முடியும். 

"நீங்கள் இவர்களைப் பிரிந்(து மரணித்)ததிலிருந்து இவர்கள் தம் மார்க்கத்தை விட்டு விலகி, தாம் வந்த சுவடுகளின் வழியே திரும்பிச் சென்று கொண்டிருந்தார்கள்'' என்று கூறுவார்கள் என்று கூறப்படுகிறது.. (புகாரி 3447, 3449) 

இந்த ஹதீஸில், நபி (ஸல்) அவர்களிடம், "நீங்கள் இவர்களைப் பிரிந்ததிலிருந்து'' என்ற வாசகம் இடம் பெறுகின்றது. நபித்தோழர்களிடமிருந்து நபி (ஸல்) அவர்கள் பிரிவதையே இது குறிக்கும் என்பதில் எந்தச் சந்தேகமும் இல்லை. எனவே இந்த வாசகமும் தடாகத்தில் தடுக்கப்படுவோர் நபித்தோழர்களில் சிலர் தான் என்பதைத் தெளிவாக உணர்த்துகின்றது. 

இந்த விளக்கங்களின் அடிப்படையில் பார்க்கும் போது, தடாகத்தில் நபி (ஸல்) அவர்கள் அழைப்பது ஒட்டு மொத்த உம்மத்தையும் அல்ல! ஸஹாபாக்களைத் தான் என்பது நன்கு தெளிவாகின்றது. பல்வேறு ஹதீஸ்களை ஒன்றிணைத்துப் பார்த்து நாம் இந்த முடிவுக்கு வருகின்றோம். 

பொதுவாக நபித்தோழர்கள் குறித்து நமது நிலையை அறிந்திட கீழ்க்காணும் நூலை வாசிக்கவும். http://onlinepj.com/books/nabithozarkalum-namathu-nilaiyum/
onlinepj.com

Posted by Unknown 2:30 AM 0 comments

ஆதம் (அலை) நபியா?

 (ஆதம் (அலை) அவர்கள் நபியல்ல என்ற கருத்தில் ஒரு பிரசுரம் கிடைத்தது. அதில் அபத்தமான வாதங்களை எடுத்து வைத்து அறைகுறையாக ஆய்வு செய்து ஆதம் நபியல்ல என்று வாதிட்டு இருந்தனர். 

ஆதம் நபி என்று சொல்பவர்கள் என்னென்ன ஆதாரங்களை வைக்கிறார்கள் என்பதைக் கூட அறியாமல் இவர்களாகவே வாதத்தையும் அதற்கான பதிலையும் வெளியிட்டு இருந்தனர். 

மேலும் ஆதம் நபி எனக் கூறும் பலவீனமான ஹதீஸையும் எடுத்துச் சொல்லி அதற்குப் பதில் சொல்லி இருந்தனர். அது நாம் எடுத்து வைக்காத வாதம். 

எனவே நாசர் அவர்களுக்கு அப்பிரசுரத்தை அனுப்பி ஆதம் நபி என்பதற்கான ஆதாரங்களையும் அர்த்தமற்ற வாதங்களுக்கான பதிலையும் தயார் செய்து அனுப்புமாறு கேட்டிருந்தோம். அவர் ஆய்வு செய்து அனுப்பியதை இங்கே வெளியிடுகிறோம்.) 

முதல் மனிதராகிய ஆதம் (அலை) அவர்கள் நபியா? இல்லையா? என்பதில் சிலர் கருத்து வேறுபாடு கொண்டுள்ளனர். முதல் மனிதராகிய ஆதம் (அலை) அவர்கள் இறைத்தூதர்தான் என்பதே நம்முடைய உறுதியான நிலைப்பாடாகும். இதற்கு திருமறைக்குர்ஆன், மற்றும் நபிமொழிகள் சான்றாகத் திகழ்கின்றன. 

முதலாவது ஆதாரம்

 ஒருவர் நபி என்பதற்கு முதன்மையான ஆதாரம் அனைத்து மக்களும் பின்பற்ற வேண்டிய மார்க்க ரீதியிலான சட்டதிட்டங்கள் அவருக்கு மட்டுமே  வஹியாக அறிவிக்கப்படும். மார்க்கச் சட்டங்கள் நபிமார்கள் தவிர வேறு யாருக்கும் அறிவிக்கப்படாது. 

அல்லாஹ்வின் விருப்பப்படி மக்கள் கட்டுப்பட வேண்டுமென்பதற்காகவே தவிர எந்தத் தூதரையும் நாம் அனுப்புவதில்லை. (அல்குர்ஆன் 4  : 64) 

மேற்கண்ட வசனம் அனைத்து மக்களும் பின்பற்ற வேண்டிய மார்க்க ரீதியிலான வழிகாட்டுதல்களை அல்லாஹ் நபிமார்கள் மூலமாக மட்டுமே தருவான் என்பதற்கு தெளிவான சான்றாகும். 
இதற்கு இன்னும் ஏராளமான சான்றுகள் உள்ளன. 

அல்லாஹ் நபி அல்லாதவர்களுக்கு மார்க்க ரீதியிலான சட்டதிட்டங்களை வஹியாக அறிவிக்க மாட்டான். 

மக்களுக்குத் தேவையான மார்க்க ரீதியிலான சட்டதிட்டங்களை அல்லாஹ் ஆதம் (அலை) அவர்களுக்கு வஹியாக அறிவித்துள்ளான். இதிலிருந்து ஆதம் (அலை) அவர்கள் இறைத்தூதர்தான் என்பது நிரூபணமாகிறது

 قُلْنَا اهْبِطُوا مِنْهَا جَمِيعًا فَإِمَّا يَأْتِيَنَّكُمْ مِنِّي هُدًى فَمَنْ تَبِعَ هُدَايَ فَلَا خَوْفٌ عَلَيْهِمْ وَلَا هُمْ يَحْزَنُونَ [البقرة/38] "

இங்கிருந்து அனைவரும் இறங்கி விடுங்கள்! என்னிடமிருந்து உங்களுக்கு நேர் வழி வரும் போது எனது நேர் வழியைப் பின்பற்றுவோருக்கு எந்த அச்சமும் இல்லை. அவர்கள் கவலைப் படவும் மாட்டார்கள்'' என்று கூறினோம். (அல்குர்ஆன் 2 : 38)

 ثُمَّ اجْتَبَاهُ رَبُّهُ فَتَابَ عَلَيْهِ وَهَدَى (122) قَالَ اهْبِطَا مِنْهَا جَمِيعًا بَعْضُكُمْ لِبَعْضٍ عَدُوٌّ فَإِمَّا يَأْتِيَنَّكُمْ مِنِّي هُدًى فَمَنِ اتَّبَعَ هُدَايَ فَلَا يَضِلُّ وَلَا يَشْقَى  [طه/122، 123] 

பின்னர் அவரை அவரது இறைவன் தேர்ந்தெடுத்தான். அவரை மன்னித்து நேர் வழி காட்டினான்.  இருவரும் ஒட்டுமொத்தமாக இங்கிருந்து இறங்குங்கள்! உங்களில் சிலர் மற்றும் சிலருக்கு பகைவர்களாவீர்கள். என்னிடமிருந்து உங்களுக்கு நேர்வழி வரும். அப்போது எனது நேர்வழியைப் பின்பற்றுபவர் வழிதவற மாட்டார். துர்பாக்கியசாலியாகவும் மாட்டார். 
(அல்குர்ஆன் 20 : 122, 123) 

அல்லாஹ் ஆதம் (அலை) அவர்களுக்கு தன்னிடமிருந்து நேர்வழி வரும் என்று குறிப்பிடுகின்றான். அல்லாஹ் ஒட்டு மொத்த சமுதாயத்தை நோக்கி பேசுவதாக மேற்கண்ட வசனத்தில் குறிப்பிட்டாலும் அதில் முதலில் வருபவர் ஆதம் (அலை) அவர்கள்தான். மற்றொரு வசனத்திலிருந்தும் ஆதம் (அலை) அவர்களுக்கு மார்க்கச் சட்டங்கள் அருளப்பட்டடிருந்தன என்பதை நாம் தெளிவாக அறிந்து கொள்ளலாம்.

 وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ قَالَ لَأَقْتُلَنَّكَ قَالَ إِنَّمَا يَتَقَبَّلُ اللَّهُ مِنَ الْمُتَّقِينَ [المائدة/27] 

ஆதமுடைய இரு புதல்வர்களின் உண்மை வரலாற்றை அவர்களுக்குக் கூறுவீராக! அவ்விருவரும் ஒரு வணக்கத்தைப் புரிந்தனர். அவர்களில் ஒருவரிடம் அது ஏற்கப்பட்டது. மற்றொருவரிடம் ஏற்கப்படவில்லை. "நான் உன்னைக் கொல்வேன்'' என்று (ஏற்கப்படாதவர்) கூறினார். "(தன்னை) அஞ்சுவோரிடமிருந்தே அல்லாஹ் ஏற்றுக் கொள்வான்'' என்று (ஏற்கப்பட்டவர்) கூறினார். 
(அல்குர்ஆன் 5 : 27) 

நூஹ் (அலை) அவர்கள்தான் முதல் நபி என்றால் ஆதம் (அலை) அவர்களின் மகன்களுக்கு இறைவனின் பக்கம் நெருக்கமாக்கி வைக்கும் ஒரு வணக்கத்தை கற்றுக் கொடுத்தது யார்? என்ற கேள்வி ஏற்படும். ஏனெனில் ஆதம் (அலை) அவர்களின் இருமகன்களும் நூஹ் (அலை) அவர்களுக்கு முந்தியவர்கள் ஆவர். 

எனவே அவர்களுக்குரிய ஷரியத்தை ஆதம் (அலை) அவர்கள் மூலமே அவர்கள் பெற்றிருக்க முடியும் என்பது தெளிவாகிறது 

எனவே ஆதம் (அலை) அவர்கள் நபியாக இருந்த காரணத்தினால் அவருடைய மகன்கள் இறைவனுக்குச் செய்ய வேண்டிய வணக்க வழிபாடுகளை ஆதம் (அலை) அவர்கள் மூலம் பெற்றுக் கொண்டனர் என்பதே சரியானதாகும். 

இதன் மூலமும் ஆதம் (அலை) அவர்கள் இறைத்தூதர்தான் என்பதை நாம் தெளிவாக விளங்கிக் கொள்ளலாம். 

சந்தேகமும் விளக்கமும் 

மர்யம் (அலை), துல்கர்னைன் (அலை), தாலூத்,  மூஸா நபியின் தாயார் , போன்ற நல்லடியார்களுக்கும் வஹி அறிவித்ததாக திருமறைக் குர்ஆன் குறிப்பிடுகிறது. எனவே அவர்களையும் நபி என்று குறிப்பிடுவீர்களா? என சிலர் இவ்விடத்தில் வினா எழுப்புகின்றனர். 

இவர்களுக்கு வஹியாக அறிவிக்கப்பட்ட செய்திகள் அவரவருக்குத் தேவையான, அல்லது ஒரு குழுவிற்குத் தேவையான சொந்த விஷயங்கள் ஆகும். இவர்களுக்கு அனைத்து மக்களும் பின்பற்ற வேண்டிய மார்க்க ரீதியிலான சட்டங்கள் வஹியாக அறிவிக்கப்படவில்லை. 

நபிமார்களுக்கம், நபி அல்லாத நல்லடியார்களுக்கு அறிவிக்கப்படும் வஹிக்கு மத்தியில் உள்ள வித்தியாசம் மிகத் தெளிவானதாகும் 

அனைத்து மக்களும் பின்பற்ற வேண்டிய மார்க்க அடிப்படையிலான வழிகாட்டுதல்களை அல்லாஹ் நபிமார்கள் மூலமாக மட்டுமே தருவான். ஆதம் (அலை) அவர்களுக்கு அல்லாஹ் மார்க்க அடிப்படையிலான வழிகாட்டுதல்களை வழங்கியுள்ளான். எனவே அவர்கள் இறைத்தூதர் ஆவார்கள். திருமறைக்குர்ஆனில் வஹி அறிவித்ததாகக் கூறப்படும் ஏனைய நல்லடியார்களுக்கு அறிவிக்கப்பட்ட விஷயங்கள் அனைத்து மக்களும் பின்பற்ற வேண்டிய மார்க்க அடிப்படையிலான செய்திகள் அல்ல.  

 இரண்டாவது ஆதாரம் 

صحيح ابن حبان (25/ 421، بترقيم الشاملة آليا( 6296 - أخبرنا محمد بن عمر بن يوسف ، حدثنا محمد بن عبد الملك بن زنجويه ، حدثنا أبو توبة ، حدثنا معاوية بن سلام ، عن أخيه زيد بن سلام ، قال : سمعت أبا سلام ، قال : سمعت أبا أمامة ، أن رجلا ، قال : يا رسول الله أنبي كان آدم ؟ قال : « نعم ، مكلم » ، قال : فكم كان بينه وبين نوح ؟ قال : « عشرة قرون » . أبو توبة اسمه : الربيع بن نافع 

ஒரு மனிதர் நபி (ஸல்) அவர்களிடம் ” அல்லாஹ்வின் தூதரே ! ஆதம் (அலை) அவர்கள் நபியாக இருந்தார்களா? எனக் கேட்டார். அதற்கு நபியவர்கள் ”ஆம்! அவர் (இறைவனுடன்) உரையாடியவர்” என்று குறிப்பிட்டார்கள். அந்த மனிதர் “ ஆதம் (அலை) அவர்களுக்கும், நூஹ் (அலை) அவர்களுக்கும் எத்தனை ஆண்டுகள் இடைவெளி?” என்று கேட்டார். அதற்கு நபியவர்கள் ”பத்து தலைமுறைகள் (இடைவெளியாகும்)” என்று கூறினார்கள். 

அறிவிப்பவர் : அபூ உமாமா (ரலி) நூல் : இப்னு ஹிப்பான் (6296) 

மேற்கண்ட ஹதீஸ் ஆதாரப்பூர்வமான செய்தியாகும். இதனுடைய அறிவிப்பாளர்களான அபுஸ்ஸல்லாம், ஸைத் பின் அபீ ஸல்லாம், அபூ தவ்பா அர்ரஃபீ பின் நாஃபிவு, ஆகியோர் முஸ்லிமுடைய அறிவிப்பாளர்கள் ஆவர்.இன்னும் நம்பகமானவர்களும் ஆவார். 

முஆவியா பின் அபீ ஸல்லாம் என்பவர் புகாரி, மற்றும் முஸ்லிம் ஆகிய இரண்டின் அறிவிப்பாளராவார். 

முஹம்மத் பின் அப்துல் மலிக் பின் ஸன்ஜவைஹி, மற்றும் முஹம்மத் பின் உமர் பின் யூசுஃப் ஆகிய இருவரும் உறுதியான அறிவிப்பாளர்கள் ஆவார்கள். 

மேற்கண்ட ஆதாரப்பூர்வமான செய்தியின் அடிப்படையில் ஆதம் (அலை) அவர்கள் இறைத்தூதர் என்பதை நாம் மிகத் தெளிவாக விளங்கிக் கொள்ளலாம். 

சில பலவீனமான அறிவிப்பாளர்கள் தொடர் வழியாகவும் மேற்கண்ட ஹதீஸ் அறிவிக்கப்பட்டுள்ளது. அவற்றை நாம் ஆதாரமாகக் கொண்டுவரவில்லை. சரியான அறிவிப்பாளர் தொடர் கொண்டுள்ள செய்தியை மட்டுமே நாம் ஆதாரமாகக் காட்டியுள்ளோம். 

இந்தன் ஹதீஸ் ஆதம் அலை அவர்கள் நபி என்று மட்டும் சொல்லவில்லை. அவர் நபிமார்களில் தனிச்சிறப்பு வழங்கப்பட்ட நபி என்பதும் உறுதியாகிறது. மூஸா நபியுடன் அல்லாஹ் நேரடியாகப் பேசியது போல் ஆதம் (அலை) அவர்களிடமும் பேசியுள்ளான். 

இத்தூதர்களில் சிலரை, மற்றும் சிலரை விடச் சிறப்பித்திருக்கிறோம். அவர்களில் சிலரிடம் அல்லாஹ் பேசியுள்ளான். அவர்களில் சிலருக்கு, பல தகுதிகளை அவன் உயர்த்தியிருக்கிறான். திருக்குர்ஆன் 2:253 

மூன்றாவது ஆதாரம் 

மறுமை நாளில் மக்கள் அல்லாஹ்விடம் பரிந்துரை செய்வதற்காக ஒருவரைத் தேடுவார்கள். ஆதம் (அலை), நூஹ் (அலை), இப்ராஹிம் (அலை), மூஸா (அலை), ஈஸா (அலை), என்று ஒவ்வொருவராகச் சென்று இறுதியாக நபி (ஸல்) அவர்களிடம் வருவார்கள். இறுதியாக நபி (ஸல்) அவர்கள் அல்லாஹ்விடம் பரிந்துரை செய்வாரகள் என்ற செய்தி புகாரி, முஸ்லிம், இன்னும் பல கிரந்தங்களில் இடம் பெற்றுள்ளது. 

மேலும் மிஃராஜ் பயணத்தின் போது முஹம்மது  நபியவர்கள், மூஸா (அலை), இபுறாஹிம் (அலை), இத்ரீஸ் (அலை), யூசுப் (அலை), ஈஸா (அலை), யஹ்யா (அலை), ஹாரூன் (அலை), போன்ற நபிமார்களையும் இவர்களுடன் ஆதம் (அலை) அவர்களைச்  சந்தித்ததாகவும் புகாரி, முஸ்லிம் போன்ற பல நூற்களில் இடம் பெற்றுள்ளது. 

மேற்கண்ட இரண்டு சம்பவங்களிலும் கூறப்பட்டுள்ள அனைத்து நபிமார்களின் பெயர்களுடன் ஆதம் (அலை) அவர்களின் பெயரும் இடம் பெற்றுள்ளது. 

நாம் ஆதம் (அலை) அவர்கள் இறைத்தூதர் தான் என்பதற்கு முதல் ஆதாரமாக திருமறைக் குர்ஆன் வசனத்தையும், இரண்டாவதாக ஆதாரப்பூர்வமான நபிமொழியையும் கண்டோம். 

எனவே மக்கள் பரிந்துரைக்காக ஆதம் (அலை) அவர்களைச் தேடிச் செல்வது அவருக்கு முதல் மனிதர், அவரை அல்லாஹ் கையால் படைத்திருப்பது, மற்றும் மலக்குமார்களை அவருக்கு ஸஜ்தாச் செய்யுமாறு கூறியது போன்ற தனிச்சிறப்புகள் இருப்பதுடன் அவர் நபியாகவும் இருக்கின்ற காரணத்தினால்தான் என்பது தெளிவாகிறது. 

ஏனெனில் மக்கள் ஒவ்வொரு நபியிடமும் சென்று அவருக்கு அல்லாஹ் வழங்கிய தனிச் சிறப்புகளைக் கூறி அல்லாஹ்விடம் தங்களுக்காக பரிந்துரை செய்யுமாறு வேண்டுகிறார்கள். அது போன்ற ஆதம் (அலை) அவர்கள் நபியாக இருக்கின்ற காரணத்தினால்தான் அவருடைய தனிச் சிறப்புகளைக் கூறி தங்களுக்காக பரிந்துரை செய்யுமாறு ஆதம் (அலை) அவர்களிடம் கோரிக்கை வைக்கிறார்கள். 

மேலும் மிஃராஜ் பயணத்தில் நபியவர்கள் ஒவ்வொரு வானத்திலும் ஒரு நபியைப் பார்க்கின்றாரகள்.  ஆதம் (அலை) அவர்கள் நபியாக இருக்கின்ற காரணத்தினால்தான் அவர்களையும் முதல் வானத்திலே நபியவர்கள் பார்க்கின்றார்கள். இதிலிருந்தும் ஆதம் (அலை) அவர்கள் இறைத்தூதர்தான் என்பது தெளிவாகிறது. 

ஆதம் (அலை) அவர்கள் முதல் நபி இல்லை என்று கூறுபவர்கள் சிலவாதங்களை எடுத்து வைக்கின்றனர். அவற்றில் சிலவற்றிற்கு நாம் முன்னர் பதில் கூறிவிட்டோம். மற்ற சில வாதங்களுக்குரிய பதிலை இப்போது காண்போம்.

கேள்வி  1

 إِنَّا أَوْحَيْنَا إِلَيْكَ كَمَا أَوْحَيْنَا إِلَى نُوحٍ وَالنَّبِيِّينَ مِنْ بَعْدِهِ 

நூஹுக்கும், அவருக்குப் பின் வந்த நபிமார்களுக்கும் தூதுச் செய்தி அறிவித்தது போல் (முஹம்மதே!) உமக்கும் நாம் தூதுச்செய்தி அறிவித்தோம். (4:163) 

இந்த வசனத்தில் நபி நூஹ் (அலை) அவர்களுக்கும் அவர்களுக்கு பின் வந்த நபிமார்களுக்கும் எவ்வாறு நாம் வஹீ அறிவித்தோமோ அதே போன்று உமக்கும் அறிவிக்கிறோம் என்று அல்லாஹ் நபி(ஸல்) அவர்களைப் பார்த்து கூறுகிறான். 

ஆதம் (அலை) அவர்கள் நபியாக இருந்திருந்தால் ஆதமுக்கு நாம் எவ்வாறு வஹீ அறிவித்தோமோ அவ்வாறே உமக்கு அறிவித்தோம் என்று அல்லாஹ் கூறியிருப்பான். ஆனால் இறைவன் நபி நூஹ் (அலை) அவர்களுக்கு அறிவித்ததைப் போன்று உமக்கு அறிவிக்கிறோம் என்று அல்லாஹ் கூறுவதின் மூலம் ஆதம் (அலை) அவர்களுக்கு இறைவன் தூதுத்துவத்தை வழங்கவில்லை என்பதை  இந்த வசனத்தின் மூலம் நமக்கு கூறுகிறான். 

என்று கூறுகின்றனர். 

தெளிவான பதில் 

மேற்கண்ட வசனத்தில் அல்லாஹ் நபிகள் நாயகம் (ஸல்) அவர்களுக்கு எவ்வாறு வஹி அறிவித்தான் என்பதைப் பற்றிக் கூறுகிறான். 

நூஹூக்கும் அவருக்குப் பின்வந்த நபிமார்களுக்கும் அல்லாஹ் எவ்வாறு வஹி அறிவித்தானோ அது போன்றுதான் நபியவர்களுக்கும் அல்லாஹ் வஹி அறிவித்துள்ளான் என்பதே மேற்கண்ட வசனத்தின் கருத்தாகும். 

ஆதம் (அலை) அவர்களின் பெயரை அல்லாஹ் குறிப்பிடாத காரணத்தினால் அவர் நபி இல்லை என்று கருத்து வராது. மாறாக ஆதம் (அலை) அவர்களுக்கு வஹி அறிவித்ததைப் போன்று நபியவர்களுக்கும், ஏனைய நபிமார்களுக்கும் அல்லாஹ் வஹி அறிவிக்கவில்லை என்பதே மேற்கண்ட வசனத்திலிருந்து விளங்கக் கூடிய கருத்தாகும். 

ஏனெனில் ஆதம் (அலை) அவர்கள் முதல் மனிதராக இருந்த காரணத்தினால் அவருக்கு அல்லாஹ் அனைத்துப் பெயர்களையும் கற்றுக் கொடுத்தது போன்று நேரடியாகப் பேசி அறிவித்துக் கொடுத்தான். இதை முன்னர் நாம் எடுத்துக்காட்டிய நபிமொழியில் இருந்து அறிந்து கொள்ளலாம். அதில் ஆதம் நபி மட்டுமல்ல முகல்லம் இறவனுடன் நேரடியாகப் பேசுபவர் என்று நபியவர்கள் கூறியுள்ளனர். ஆதமுக்கு அறிவித்தது போல் நபியவர்களுக்கு வஹீ அறிவிக்காமல் நூஹ் நபிக்கு அறிவித்தது போல் தான் அறிவித்துள்ளான்.. 

ஆதம் (அலை) அவர்களுக்கு அல்லாஹ் வஹி அறிவித்ததைப் போன்று மற்ற எந்த நபிக்கும் அல்லாஹ் வஹி அறிவிக்கவில்லை என்பதே சரியான கருத்தாகும். 

கேள்வி : 2 

ஷஃபாஅத் பற்றிய ஹதீஸில் மக்கள் நூஹ் (அலை) அவர்களிடம் சென்று ”நீங்கள்தான் பூமியிலுள்ளவர்களுக்கு அல்லாஹ் அனுப்பி வைத்த தூதர்களில் முதலாமவர்” என்று கூறுவார்கள் என வந்துள்ளது. ( பார்க்க புகாரி 4476, 4712, 6565) 

மேற்கண்ட ஹதீஸில் நூஹ் (அலை) அவர்கள்தான் பூமியிலுள்ளவர்களுக்கு அனுப்பப்பட்ட முதல் தூதர் என்று வருகிறது. எனவே நூஹ் (அலை) அவர்கள்தான் முதல் தூதர். ஆதம் நபி கிடையாது. 

தெளிவான பதில்  

மேற்கண்ட செய்தியில் பொத்தாம் பொதுவாக நூஹ் (அலை) அவர்கள் முதல் தூதர் என்று குறிப்பிடப்படவில்லை. மாறாக. 

يَا نُوحُ أَنْتَ أَوَّلُ الرُّسُلِ إِلَى أَهْلِ الْأَرْضِ 

நூஹே ! நீர் பூமியில் உள்ளவர்களுக்கு முதல் தூதர் ஆவீர். (புகாரி 3340) 

يَا نُوحُ أَنْتَ أَوَّلُ الرُّسُلِ إِلَى الأَرْضِ 

மக்கள் நூஹ் (அலை) அவர்களிடம், "நூஹே! நீங்கள் பூமிக்கு முதல் ரசூல் ஆவீர்கள்'' என்றும் கூறுவார்கள். (ஸஹீஹ் முஸ்லிம் - 327)

 أَوَّلُ رَسُولٍ بَعَثَهُ اللَّهُ إِلَى أَهْلِ الْأَرْضِ 

நூஹே ! நீர் பூமியில் உள்ளவர்களுக்கு அல்லாஹ் அனுப்பிய முதல் தூதர் ஆவீர். (புகாரி 4476)  

  أَوَّلَ نَبِيٍّ بَعَثَهُ اللَّهُ إِلَى أَهْلِ الْأَرْضِ 

பூமியில் உள்ளவர்களுக்கு அல்லாஹ் அனுப்பிய முதல் நபி (நூஹ்) ஆவார். (7440) 

உலகத் தூதராக அனுப்பப்பட்ட முதல் தூதர் நூஹ் அவர்கள் தான். அதனால் தான் அவரது காலத்தில் முழு உலகுக்கும் பிரளயத்தை ஏற்படுத்தில் அழித்தான். அதற்கு முன்னர் அனுப்பப்பட்ட நபிமார்கள் ஒரு குடும்பத்துக்கோ ஒரு பகுதிக்கோ ஒரு கோத்திரத்துக்கோ தான் அனுப்பப்பட்டனர். பூமியில் உள்ளவர்களுக்கு அனுப்பப்பட்ட முதல் தூதர் என்பதில் இருந்து இதனை அறியலாம். 

அதுமட்டுமின்றி நூஹ் நபி தான் முதல் நபி என்றால் அவருக்கு முன்னர் வாழ்ந்த மக்களுக்கு இறைவன் எந்த வழிகாட்டலையும் வழங்கவில்லை என்று ஆகும். அதுவரை யார் வேண்டுமானாலும்ம் எப்படி வேண்டுமானாலும் நடக்கலாம் என்று அல்லாஹ் விட்டுவிட்டான் என்று ஆகும். இறைத்தூதர் வராவிட்டால் தொழுகை நோன்பு உள்ளிட்ட எந்த வணக்கத்தையும் அவர்கள் செய்திருக்க முடியாது.

onlinepj 

Posted by Unknown 10:23 PM 0 comments