சீனா: வணிக நோக்கு - ஆட்டுப்பால், மாட்டுப்பால், கழுதைப்பால் வரிசையில் விற்பனைக்கு வந்துள்ள ‘தாய்ப்பால்’

"தாய்ப்பாலுக்குக் கணக்குப் போட்டா தாலி மிஞ்சுமா?" என்று கேட்கிறது தமிழ்ப் படப் பாடல் வரி ஒன்று. தாய்மையின் புனிதச் சின்னமான தாய்ப்பாலையும் வணிகப்படுத்தி பணம் பார்க்கும் நிலை சீனாவில் நிலவுவதாக செய்திகள் தெரிவிக்கின்றன.

அண்மைக்காலமாக, சீனாவில் தாய்ப்பால் விற்பனை மிகவும் சூடுபிடித்துள்ளதாம். இதற்காக ஏழைத் தாய்மார்கள் கூலிக்கு அமர்த்தப்படுகின்றனராம். ஆயினும் இதற்கு கடும் எதிர்ப்பு எழுந்துள்ளது.

முன்னதாக, தாய்ப்பாலைப் பயன்படுத்தி கேக்குகள், ஐஸ்க்ரீம்கள் போன்ற தின்பண்டங்கள் செய்யப்பட்டது நினைவிருக்கலாம். தற்போது, சீனாவில், ஊட்டச் சத்து நிறைந்தது, உடலுக்கு அதிக எதிர்ப்பு சக்தியை அளிக்கும் எனக்கூறி தாய்ப்பாலை புட்டியில் அடைத்து விற்க பல தரகு அமைப்புகள் திடீரென்று முளைத்துள்ளனவாம். மாசுவற்றது என்பதால் தாய்ப்பால் வாங்க பெரும் சந்தை உள்ளதாம்.

குழந்தைகளுக்கு மட்டுமின்றி வயதானவர்களும் தாய்ப்பாலை விலைக்கு வாங்கி குடிக்க ஆர்வம் காட்டி வருகின்றனராம். இதற்காக சிறிய அளவிலான இயந்திரங்களும் மறைமுகமாக விற்பனைக்கு வந்துள்ளன. தாய்மார்களிடம் இருந்து சிறிய பம்ப் மூலம் தாய்ப்பாலை உறிஞ்சி கணிசமான விலைக்கு விற்கின்றனர். இதற்காக தாய்மார்களுக்கு கூலியும் கொடுக்கப்படுகிறது. ஒருவருக்கு அவரவர் உடல் தகுதிக்கு ஏற்ப ரூ.1 லட்சம் முதல் 2 லட்சம் வரை கூலியாக கொடுக்கப்படுகிறது.

பெண்களை வர்த்தக பண்டமாக நடத்தும் நிலைக்கு சீனா சென்றுள்ளது வருத்தத்தை அளிப்பதாக பலரும் கடும் கண்டனம் தெரிவித்துள்ளனர். ஊடகச் செய்திகளை வைத்து சென்சென் மாகாணத்தில் தாய்ப்பால் விற்று வந்த சின்சின்யு என்ற நிறுவனத்தின் உரிமத்தை சீன அரசு நீக்கம் செய்துள்ளது.

எல்லாவற்றிலும் காசு பார்க்கும் இந்த கீழான உத்திக்கும், பெண்மையையும் தாய்மையையும் ஒரு பண்டமாகப் பார்க்கும் மனப்பான்மைக்கும் அந்நாட்டிலும் பெரும் எதிர்ப்பு கிளம்பியுள்ளதாம்.