மானங்கெட்ட அமெரிக்காவும் மெளனம் காக்கும் மற்ற நாடுகளும்!

எட்வர்ட் ஜோஸஃப் ஸ்னோடென்! - யார் இவர்? - அண்மைக்காலமாக ஊடகங்களில் பரபரப்பாக அடிபடும் பெயராக இருக்கிறதல்லவா?

அப்படி என்ன செய்துவிட்டார் இந்த ஸ்னோடென்? வேறு ஒன்றுமில்லை. உங்கள் வீட்டுப் படுக்கையறையை; குளியலறையை பல வருடங்களாக எட்டிப்பார்த்துவந்த ஒரு பெரும் ரவுடியை படம் பிடித்துக் காட்டியிருக்கிறார் - அந்த உலக மகா ரவுடியால் தனது சொகுசான வாழ்வாதாரத்துக்கும், உயிர், உடமைக்கும் ஆபத்து வரும் என்று தெரிந்தும் கூட.

ஜார்ஜ் ஆர்வெல்லைத் தெரியுமா உங்களுக்கு? கடந்த நூற்றாண்டின் ஆங்கில நாவலாசிரியர்களுள் ஒருவர். ஸ்காட்லாந்து காரர். 1949ல் அவர் எழுதிய மகா பிரசித்திப் பெற்ற புதினத்தின் பெயர் 1984. ஆம், பெயரே 1984 தான். ( 'பெரியண்ணன்' (Big Brother) போன்ற சொல்லாடல்கள் பிரபலமானது அந்த நாவலுக்குப் பிறகு தான் ). அந்த நாவலில் சொல்லப்பட்டதெல்லாம், ஒரு சர்வாதிகார அரசு தன்னுடைய சுயநலனுக்காக மற்ற நாடுகளின், பொதுமக்களின் படுக்கையறையை எட்டிப் பார்க்கும் கேவலத்தைப் பற்றியது தான். அப்படி அந்த நாவலின் பேசுபொருளாயிருந்த கேவலம் ஒன்று இதோ இன்று முழுக்க முழுக்க உண்மையாகியிருக்கிறது. அதுவும் தொட்டது தொடாததற்கெல்லாம் மனித உரிமை என்று வாய் கிழியப் பேசும் அமெரிக்க ஏகாதிபத்தியம், பொதுமக்களின், பிறநாடுகளின் படுக்கையறையை, குளியலறையை எட்டிப் பார்க்கும் மானங்கெட்ட செயலை செய்துவிட்டு மாட்டிக்கொண்டு விழிக்கிறது.

அமெரிக்காவின் இந்த ஈனச்செயலை அம்பலப்படுத்தியவர் தான் இந்த ஸ்னோடென். உள்ள உறுதி கொண்ட மனிதனுக்கு முன் வல்லரசு சாம்ராஜ்யமும் மண்டியிடும் என்று நிரூபித்துக் காட்டியிருப்பவர் அவர். தனிமனித ஒழுக்கத்தில் அடுத்தவரின் அந்தரங்கத்தைப் புனிதமென்று போற்றிவந்த அமெரிக்க தேசம் இன்றோ கேவலத்தின் சேறு அப்பிய தன் முகத்தை மறைக்க சிறு கைக்குட்டை கூட இல்லாமல் அம்மணத்துடன், அவமானப்பட்டு, அசிங்கப்பட்டு நிற்கிறது.

சி ஐ ஏ எனப்படும் அமெரிக்க மத்தியப் புலனாய்வு முகவத்தின் முன்னாள் பணியாளர் தான் எட்வர்டு ஜோஸஃப் ஸ்னோடன். தேசிய பாதுகாப்பு முகவம் (NSA) என்கிற இன்னொரு அரசுசார் உளவு நிறுவனத்தில் முறைமை நிர்வாகி (ஸிஸ்டம் அட்மின்) என்று பணிபுரிகையில் ஹவாயில் பூஸ் ஆல்லன் ஹாமில்ட்டன் என்னும் நிறுவனத்திற்குச் செல்ல வேண்டி வந்தது. அங்கே தான் அவருக்கு அதிர்ச்சி காத்திருந்தது. தனிநபர் சுதந்திரமிக்கவர்கள் என்று சொல்லப்படும் அமெரிக்கர்களின் அனைத்து அந்தரங்கங்களையும் அமெரிக்க அரசே ஆவணப்படுத்தி வைத்திருந்தது. முப்பட்டக கண்காணிப்புத் திட்டம் (PRISM surveillance programme) என்று அதற்குப் பெயராம். தொலைபேசிகள், இணையத் தளத் தொடர்பாடல்கள், தனிமனிதர்கள், அரசுகள் என்று அனைவரின் அந்தரங்கத் தொலைத்தொடர்புகளும் அங்கே 'சேகரித்து'வைக்கப்பட்டிருந்தன. உலகின் மிகப்பெரும் அதிதிறன் கணினி(Super Computers)களையும் சங்கேத மொழிபெயர்ப்புக் கணிதவியலாளர்களையும் கொண்டதாம் இந்த என் எஸ். ஏ .

அமெரிக்கர்கள் என்றில்லை, அனைத்து நாட்டு மக்களின், அரசுகளின் மிகப் பிரத்யேகமான அந்தரங்க, இராணுவத் தகவல்களும் கூட அங்கே 'திருடப் பட்டு' வைக்கப்பட்டிருந்தன. உலகப் போலீஸாகத் தன்னைக் காண்பித்துக்கொள்பவன் தான் உள்ளதிலேயே மிகப் பெரிய திருடன் என்று அறியவந்தபோது ஸ்னோடென் அதிர்ந்துபோனார். தன்னுடைய, சக அமெரிக்கர்களுடைய. பிற மனிதர்களுடைய உரிமையை மீட்க உறுதி பூண்டார்.

ஒரு கொடும் வல்லரசை தனிமனிதனாகத் தன்னால் எதிர்க்க முடியாது என்பதை ஸ்னோடென் உணர்ந்தே இருந்தார். இரண்டு இலட்சம் டாலர்கள் கிடைத்துக்கொண்டிருக்கும் வேலை பறிபோகும். குடும்பத்தினருக்கு பெரும் சிரமங்களும் கஷ்டங்களும் ஏற்படும். தன்னல அறிவுள்ள எந்த மனிதனும் இப்படிப்பட்ட சூழலில் வல்லரசை எதிர்க்கத் துணியமாட்டான். ஆனால், நரி இடம் போனாலென்ன; வலம் போனாலென்ன, என்னைக் கடிக்காமல் இருக்கட்டும் என்கிற சராசரி மனநிலையிலிருந்து மாறுபட்டார் ஸ்னோடென்.

உடனடியாக கார்டியன் என்கிற பிரசித்தி பெற்ற ஊடகத்தின் செய்தியாளர் க்ளென் க்ரீன்வால்ட்டையும், நாற்பது வருடங்களுக்கு முன்பு இதேபோல் மக்கள் உரிமைக்குப் போராடிய டேனியல் எல்ஸ்பெர்க் என்பவரையும் தொடர்பு கொண்டார். அமெரிக்க அரசின் அயோக்கியத்தனத்தைத் தோலுரிக்கும் தன் முயற்சியில் இணையும் ஊடகத்தார்கள் தன்னால் துன்பம் அனுபவிக்கக் கூடாது என்று கருதிய ஸ்னோடென், கார்டியனிலும், வாஷிங்ட்டன் போஸ்ட்டிலும் தானளிக்கும் செய்திகளையை ரகசியமாகவே வெளியிடும்படி கேட்டுக்கொண்டார். மேலும் தேவைப்பட்டால் இந்தத் தகவல்களை அளிப்பவராகத் தன்னை இனங்காட்டலாம் என்றும் தெளிவாகத் தெரிவித்தும்விட்டார்.

கடந்த மே மாதம் 20 ம் தேதி சீன ஆட்சிக்குட்பட்ட ஹாங்காங் சென்றார் ஸ்னோடன். ஜூன் 6 முதல் உலகையே அதிரவைத்த அமெரிக்க அரசின் அயோக்கியத் தனங்களை காட்சிப்படுத்தத் தொடங்கினார். அமெரிக்காவின் கேவலமான முகம் உலகிற்கு மீண்டுமொரு முறை வெளிப்பட்டது. அதைப் படம் பிடித்துக் காட்டிய ஸ்னோடென்னோ ஹாங்காங்கின் பல்வேறு விடுதிகளில் ஒளிந்து வாழ நேரிட்டது. இப்போதும், ரஷ்யா வழியாக ஈக்வடார் செல்ல விரும்புகிறார் ஸ்னோடென். அங்கே தான், விக்கிலீக்ஸ் ஜூலியன் அசாஞ்சே இருக்கிறார். உண்மையான மனித உரிமை உடையதாகக் கருதப்படுகின்றன ஈக்வடார் உள்ளிட்ட லத்தீன் அமெரிக்க நாடுகள். ஸ்னோடென்னின் தைரியத்தைப் பாராட்டும் ஜூலியன் அசாஞ்சே "எப்படியாவது ஈக்வடார் வந்துவிடு தம்பி" என்று ஸ்னோடென்னை அழைத்துக்கொண்டிருக்க, அமெரிக்க ஏகாதிபத்தியமோ "ஒழுங்கு மரியாதையாக ஸ்னோடென்னை ஒப்படைத்துவிடு" என்று ரஷ்யா உள்ளிட்ட நாடுகளை மிரட்டிக் கொண்டிருக்கிறது. "அப்படியெல்லாம் ஒப்படைக்க முடியாது" என்று ரஷ்யா போன்ற நாடுகள் மறுத்தாலும், "உலக நாடுகளின் அந்தரங்கங்களை நீ எப்படி எட்டிப் பார்க்கலாம்?" என்று அமெரிக்காவைக் கேள்வி கேட்கும் தைரியத்தை அவை பெறவில்லை. இந்தியாவும் தான். அப்படிப் பார்த்தால், மானங்கெட்ட செயல் செய்த அமெரிக்காவைத் தட்டிக் கேட்கும் திராணியற்று மானங்குலைந்து நிற்பவை மற்ற நாடுகளே.

- இப்னு ஹம்துன்

Posted by Unknown 12:51 AM 0 comments

மோடியின் காசுக்கு விலை போகும் பத்திரிக்கைகள்!​

பத்திரிக்கைகள் உண்மை செய்திகளை தருகிறதா?இதோ காசுகளை வாங்கிக்கொண்டு பின்பாட்டு பாடும் பத்திரிக்கைகளின் உண்மை செய்திகளை தெரிந்து கொள்ளுங்கள்....

இன்றைய மாலை மலர் இணையதளத்தில்"உத்தரகாண்டில் தவித்த 15,000 குஜராத் பக்தர்கள் மீட்பு" என்ற தலைப்பில் ஒரு செய்தி.

உத்தரகாண்ட் இயற்கை சீற்றத்தில் பாதிக்கப்பட்டவர்களை மீட்பதில் இராணுவமும் தன்னார்வலர்களும் படாதபாடு பட்டுக்கொண்டிருப்பதாக செய்திகள் நேரடிக் காட்சிகளாகவே வந்துகொண்டிருக்கும் நிலையில், ஒரேயடியாக குஜராத்தைச் சேர்ந்த 15,000 பேர் பாதுகாப்பாக மீட்கப்பட்டு சொந்த இடம் அழைத்து வரப்பட்டதான அச்செய்தி மனதிற்கு மகிழ்ச்சியைத் தந்தது.

ஆனால், செய்தியின் உள்ளே வாசித்தபோது இப்படியும் பத்திரிக்கைகள் மக்களின் காதில் பூச்சுற்றுமா என்ற ஆச்சரியமே மேலோங்கியது.

மீட்கப்பட்ட பக்தர்களைக் குஜராத் அழைத்து வந்தது தொடர்பாக செய்தியினுள் மாலை மலர் குறிப்பிட்டுள்ள வாக்கியம் கீழே:

"சுமார் 80 டொயோட்டா இன்னோவா கார்கள் வரவழைக்கப்பட்டன. அதில் ஏற்றப்பட்ட பக்தர்கள் டேராடூன் வந்தனர். அங்கிருந்து அவர்கள் 4 சிறப்பு விமானம் மூலம் குஜராத் போய் சேர்ந்து விட்டனர். மேலும் 25 ஏ.சி. பஸ்கள் மூலம் குஜராத் பக்தர்களில் மற்றொரு குழுவினர் டெல்லி அழைத்து செல்லப்பட்டனர்."

ஒரு இன்னோவா காரில் 15 பக்தர்களை அடித்துத் திணித்து கொண்டு வந்ததாக கணக்கிட்டாலும் 80 x 15 = 1200 பேர்.

ஒரு ஏ சி பஸ்ஸில் 50 பேர் எனக் கணக்கிட்டாலும் 25 x 50 = 1250 பேர்

மொத்தம் 2450 பேர் தான் வருகிறது. சரி இன்னோவா காரில் 25 பேர் என்றும் ஏ சி பஸ்ஸில் 100 பேர் என்றும் கணக்கிடுவோம். அப்படிப்பார்த்தாலும் 4750 பேர் தான் வருகிறது. எப்படியோ, 5000 பேர் போனார்கள் என்றே வைத்துக் கொள்வோம். இன்னும் 10000 பேர் எப்படி போய் இருப்பார்கள் என்று புரியவில்லை. கணக்கு எங்கோ இடிக்குது.

என்னமா கலர் கலர் ரீல் விடுறீங்க. காசு வாங்கிட்டு எழுதுங்க. அதுக்காக இப்படியா. முடியல!

இதையே தினமலர், "இந்த வேகம் யாருக்கப்பா வரும்.... 15000 பேரை மீட்ட 'ரேம்போ மோடி'" என்ற தலைப்பில் கீழ்கண்டவாறு எழுதியுள்ளது.

"இதற்கென 80 டோயோட்டா இன்னோவோ கார்கள் வரவழைக்கப்பட்டன. இதில் பக்தர்கள் ஏற்றி டேரோடூனுக்கு கொண்டு வரப்பட்டனர். பின்னர் இவர்கள் 4 விமானம் மூலம் டில்லிக்கு அழைத்து வரப்பட்டனர். அவர்களை அழைத்து வர 25 சொகுசு பஸ்கள் தயார் நிலையில் இருந்தன . மொத்தம் 15 ஆயிரம் குஜராத்தியர்கள் மீட்கப்பட்டுள்ளனர். மோடி தானே களத்தில் இறங்கி தமது மாநில மக்களை மீட்டு வந்த சம்பவம் இம்மாநில மக்களின் பெரும் பாராட்டை பெற்றுள்ளது."

மீட்பு இடத்திலிருந்து 80 இன்னோவா கார்களில் டேராடூன் வரை. டேராடூனிலிருந்து 4 விமானங்களில் டெல்லி வரை. டெல்லியிலிருந்து 25 சொகுசு பேருந்துகளில் குஜராத்திற்கு!

அப்படி எடுத்துக்கொண்டாலும், 4 விமானம் 15,000 பேரை டெல்லி கொண்டு வர எத்தனை முறை வந்து திரும்பியிருக்கும். 25 பேருந்துகள் டெல்லியிலிருந்து குஜராத்திற்கு 15000 பேரை ஏற்றி செல்ல எத்தனை முறை வந்து திரும்பியிருக்கும். 80 இன்னோவாக்கள் உத்தர்காண்டிலிருந்து டேராடூனுக்கு 15000 பேரைக் கொண்டு செல்ல எத்தனை முறை வந்து திரும்பியிருக்கும்?

மோடி ரேம்போவோ, சில்வஸ்டர்ஸ்டாலனோ, ஹிட்லரோ - யாராக வேண்டுமானாலும் இருக்கட்டும். மோடியின் விளம்பர காசுக்கு, கொஞ்சம் கூட மானம் சூடு சுரணையின்றி சுய அறிவை மொத்தமாக இழந்து துதிபாடும் இப்பத்திரிக்கைகளின் மாமா வேலைக்கு என்ன பட்டம் கொடுக்கலாம் என்பதுதான் தற்போதைய கேள்வி!

- அருள், கத்தார்

Posted by Unknown 1:05 AM 0 comments

தமிழக முஸ்லீம் தலைவர்களை சிக்க வைக்க சிறைகைதிகளைச் சித்ரவதை செய்யும் பெங்களூரு காவல்துறை!

கர்நாடக சட்டமன்ற தேர்தலுக்கு முன் பெங்களூரு பாஜக அலுவலகம் அருகே நடத்தப்பட்ட குண்டு வெடிப்பில் தமிழக முஸ்லீம் தலைவர்களை சிக்க வைக்க சிறைகைதிகளை காவல்துறை சித்ரவதை செய்வதாக கைது செய்யப்பட்டவர்களின் குடும்பத்தினர் தெரிவிக்கின்றனர்.

நடந்து முடிந்த கர்நாடக சட்டப்பேரவை தேர்தலுக்கு முன்னர், பெங்களூரு பாஜக அலுவலகம் அருகே நடத்தப்பட்ட குண்டு வெடிப்பில் 16 நபர்கள் காயம் அடைந்தனர். இக்குண்டு வெடிப்பு சம்பந்தமாக மேலப்பாளையத்தை சேர்ந்த கிச்சா புகாரி மற்றும் கோவையைச் சேர்ந்த சிலர் கைது செய்யப்பட்டனர். தமிழக காவல்துறையின் ஒத்துழைப்புடன் கைது செய்யப்பட்ட இவர்கள் கர்நாடகா சிறை காவலில் உள்ளனர்.

இவர்களைக் கைது செய்து ஒரு மாதம் ஆகியும் இது வரை, பெங்களூரு குண்டு வெடிப்பில் அவர்களுக்குத் தொடர்புடையதாக எவ்வித ஆதாரத்தையும் காவல்துறை கண்டுபிடிக்கவில்லை என்பது குறிப்பிடத்தக்கது. கைது செய்யப்பட்டவர்களின் குடும்ப உறுப்பினர்களோ இவர்கள் அப்பாவிகள் என்றும் கோவை சிறையில் உள்ளவர்களின் விடுதலைக்குப் பாடுபடுவதாலே அநியாயமாக பொய் வழக்கில் கைது செய்யப்பட்டுள்ளதாகவும் கூறுகின்றனர்.

சிறையில் இருந்தவர்களைப் பார்த்து விட்டு வந்த அவர்களது குடும்பத்தினர், இக்குண்டுவெடிப்பில் தொடர்பிருப்பதாக ஒத்து கொள்ள சொல்லி காவல்துறையினர் சித்ரவதைப்படுத்துவதாக புகார் கூறியுள்ளனர். மேலும் இக்குண்டுவெடிப்புகளை செய்ய தூண்டியது பெங்களூரு அக்ரஹார சிறையில் மற்றொரு வழக்கு தொடர்பாக சிறையிடப்பட்டுள்ள கேரள மக்கள் ஜனநாயக கட்சி தலைவர் மதானிதான் என்று ஒத்து கொள்ளுமாறும் தமிழகத்தில் உள்ள இந்திய தவ்ஹீத் ஜமாத் தலைவர் பாக்கர் அதற்கு உதவி செய்ததாக வாக்குமூலம் தரக்கூறி கடும் சித்ரவதைகள் செய்வதாகவும் கூறியுள்ளனர்.

மேலும் சிறை காவலில் தினந்தோறும் மது அருந்தி விட்டு காவலர்கள் குழு கீழ்கண்ட முறையில் சித்ரவதை செய்ததாகவும் குடும்பத்தினர் கூறுகின்றனர்.

1. பஞ்சாப் கட் - கால்தொடைகள் மீது காவலர்கள் ஏறிக்கொள்ள சிலர் முதுகை சுவற்றின் மீது சாய்த்தவாறு வைத்து விட்டு கால்களை சுவற்றின் பக்கம் வளைப்பார்கள்.

2. எரோப்லன் மெதட் - கை கால்களை கட்டி மாட்டுக்கு லாடம் கட்டுவது போல் அந்தரத்தில் தொங்கவிட்டு அடிப்பது. இப்படி அடித்தபோது சில நேரங்களில் சிறுநீர், பேதி வெளி வந்து விடும்.

3. நிர்வாணப்படுத்தி விட்டு பிறப்புறுப்பில் தொடைகளில் பெற்றோலை ஊற்றி மிளகாய் பொடி தூவியுள்ளனர். அந்த வேதனையைப் பார்த்து ரசித்து சிரித்துள்ளனர்.

4. குடிகார காவலர்கள் அடிக்கும்போது வலியில் எவ்வளவு கத்தினாலும் விடமாட்டார்கள். மயக்கமடைந்தால் பல்ஸ் பார்த்து சுடு நீர் ஊற்றி எழுப்பி, வலி நீக்கும் ஸ்ப்ரே அடித்து விட்டு மீண்டும் அடிப்பார்கள்.

5. அடிக்கும் போது வலி தாங்காமல் அல்லாஹ் என்று கத்தினால் "கூப்புட்றா உன் அல்லாவை, வரானா பாப்போம்" என்று கிண்டல் செய்கின்றனர்.

கைது செய்து ஒரு மாதமாகியும் எந்த ஆதாரமும் இன்றி தொடர்ந்து கஸ்டடியில் வைத்து சித்ரவதை செய்யும் காவல்துறையின் அராஜக போக்கை அரசு தடுத்து நிறுத்தவேண்டும். குற்றம் செய்தவர்கள் தண்டனை அனுபவித்தே ஆகவேண்டும். ஆனால், எந்த ஆதாரமும் இன்றி நிர்பராதிகள் சித்ரவதை செய்யப்படுவதும் அநியாயமாக வழக்குகளில் சிக்க வைக்கப்படுவதும் தடுத்து நிறுத்தப்பட்டே ஆகவேண்டும். இல்லையேல், அது ஆளும் அரசுகளின்மீது மக்களுக்கு இருக்கும் நம்பிக்கையினைப் பொய்த்துப்போக வைக்கும் என்பதை அரசுகள் உணர்ந்து வேக நடவடிக்கை எடுக்கவேண்டுமென்பதே அப்பாவி மக்களின் எதிர்பார்ப்பாகும்.

- ஃபெரோஸ்கான்

இன்நேரம்..

Posted by Unknown 11:20 PM 0 comments